› 選擇地區
三藩市
紐約
洛杉磯
其他美國地區
香港 台灣 北美
 
2016年07月22日

【不理阿莫】
《寒戰3》惡搞劇本流出

梁樂民和陸劍青執導的電影《寒戰2》上映兩周,在內地和香港票房均報捷,這集留下不少伏線,拍攝第三集是勢在必行。究竟導演和編劇們今次會如何扭橋?

最合理劇本:
第三集重頭戲應該係講特首選戰,兩大陣形明顯係律政司司長李子雄同保安局局長劉德華對壘。李子雄背後勢力,有前一哥,有回歸前解散的差人,是港英份子;至於劉華這邊,雖然電影沒交待幕後勢力,但唔使問,一定係中央委派。棋子方面,第二集已經講到梁家輝畀張國柱同李子雄拉攏,而城城喺第一集亦交待咗係劉華心腹,再加上佢出爾反爾射傷梁家輝個仔,預計第三集城城同梁家輝將會完全對立,互揭瘡疤,咁城城食夾棍吞5000萬贜款單嘢、梁家輝同彭于晏、張國柱嘅三人合照、同埋梁家輝班下屬喺95年幫佢孭咗咩鑊,將會成為主線。至於發哥這個大律師角色亦勢成關鍵。預計第三集會解釋點解佢喺最後十五分鐘先決定加入獨立調查會嚟調查城城、佢同JM老竇嘅歷史、同埋交待佢同第一集亂揸車個富二代有咩關係。根據發哥教育背景,佢原本應該同李子雄都係「港英餘孽」,但因為契女JM嘅死,令發哥歸邊幫城城,變相第三集係城城、發哥、劉華聯手大戰李子雄、梁家輝同彭于晏。

劇本二:郭富城係大反派
彭于晏話城城袋咗5000萬,當然係老屈,實情係袋咗五億至真,只不過城城有劉華撐腰,冇人敢challenge佢。城城表面上正氣凜然,口口聲聲話要捍衞法治精神,其實佢先係大反派。咁點解郭富城喺機場會無端端放走張國柱,而唔係直接塔佢返差館?真相係城城係張嘅私生子,就連梁家輝、彭于晏都唔知!所以城隧槍戰,張只係作狀fea吓城城,射極都唔中!兩父子其實係夾埋食夾棍,城城特登搞到警隊立立亂,張就乘機sell佢套安全系統,裏應外合。第三集,城城魔性盡現,先利用一哥特權鏟除蔣志光同黃德斌,再聯合ICAC嘅李治廷,去削弱梁家輝為首嘅鷹派勢力。

劇本三:楊采妮係大反派
楊采妮話晒都係總警司,有權有勢,本身又係靚女,城城有乜理由會揀馬伊琍先?貪佢開花店溫柔啲?楊采妮表面上同城城客客氣氣,暗地想報仇好耐。與此同時,其實楊采妮一直同梁家輝有路,喺第一集《寒戰》,梁以為楊同城城藕斷絲連,先會咁嬲。到第二集,楊采妮繼續用美色離間梁家輝同城城,臨尾仲答應同梁一齊行動,仲幫手寫靚個report。去到第三集,楊采妮會露出狐狸尾巴,再唔係唯唯諾諾之流,而係逼到城城家破人亡,完成終極復仇大計。

劇本四:梁家輝忍辱負重
第二集《寒戰》,平時老奸巨滑嘅梁家輝好似傻仔咁,畀城城舞到陀陀擰。班手下死晒,個仔又差啲畀城城辣低。結尾家輝揸實拳頭,好似入魔道咁,梗係以為佢會依附張國柱,伺機向城城十倍奉還。但大家記唔記得,第一集家輝可以大義滅親,點會為咗報仇,或者局長個位而狼狽為奸?實情係佢要忍辱負重做無間道,因為佢明知李子雄同張國柱只係棋子,但又想一舉搗破幕後主腦,所以故意扮入魔道,藉此爭取張國柱同李子雄嘅信任,然後再秘密同城城夾計,連根拔起恐怖勢力。

劇本五:綠葉串星全部係針
知唔知點解成個系列咁多串星,又伍家謙又方健儀又湯怡又唐寧,個個都唔夠三句對白?其實佢哋全部都係針嚟!而邊個係呢班針嘅阿頭?你以為係老廉大佬徐家傑?其實係梁樂民同陸劍青兩位導演囉。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載