› 選擇地區
三藩市
紐約
洛杉磯
其他美國地區
香港 台灣 北美
 
2016年07月28日

【馮仁昭四圍超】
許冠傑踩入石硤尾Jam歌

許冠傑噚日喺石硤尾開騷,同兩個仔懷欣、懷谷、鄧建明及雷有輝等合唱《天才與白痴》。

歌神許冠傑(Sam)噚日喺石硤尾嘅賽馬會創意藝術中心幫無綫拍特輯,雖然現場冇冷氣,都吸引咗逾百人去睇,無綫就安排咗吳若希、許廷鏗、胡鴻鈞同埋糖妹,分別同Sam合唱唔同嘅歌,好似吳若希就會同Sam唱《心裡日記》,許廷鏗就唱《明我以德》,吳若希話唔敢望Sam哥,但好開心對方第一次見自己就叫得出佢個名。

甩嘴要求重唱

噚日下晝兩點幾已經有歌迷聚集,Sam喺兩點半左右現身,好受得熱嘅Sam更無懼30幾度高溫,喺室外綵排依然戴帽、長袖衫同圍巾出動,唱咗《鐵塔凌雲》、《世事如棋》、《浪子心聲》等幾首歌後就入咗冷氣房休息。
迷你演唱會接近7點開始,Sam出場即唱《這一曲送給你》,之後又叫兩個仔懷欣、懷谷同契仔上台合唱《父母恩》,然後又同鄧建明、雷有輝、懷谷等人合唱《天才與白痴》及《半斤八両》,要求完美嘅Sam唱罷兩首歌嫌自己有少少甩嘴,仲要求重唱一次㖭,其實Sam噚晚有多首歌都被要求重唱,包括《鐵塔凌雲》、《明我以德》等。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載