› 選擇地區
三藩市
紐約
洛杉磯
其他美國地區
香港 台灣 北美
 
2016年08月05日

「佢哋覺得生咗BB唔使咁搏」
陳倩揚遭無綫封殺 離巢爆大鑊

【《蘋果》專訪】現年32歲、育有兩子的「靚太港姐」陳倩揚,去年底爆seed在fb暗寸無綫「一朝天子一朝臣,你懂的。」據聞當時余詠珊下令革新《東張西望》,令一班老臣子無得留低。陳倩揚日前接受本報專訪,談到傾談續約過程中,雙方意見不一,有高層揚言:「生咗BB、做咗媽咪,你都可以唔使咁搏吖!」令她不是味兒,終決定前日約滿後離開。

相關新聞:【新女胸降】32C林泳淘《東張》真空

陳倩揚參選2008年港姐得亞軍入行,未卸任已獲派入《東張西望》做主持,不經不覺已經七年。但去年底,無綫高層余詠珊要換入「有線幫」陳貝兒、區永權、李潤庭等人,故「老臣子」陳倩揚、黎芷珊和麥雅緻統統被革走。去年12月30日,倩揚主持完最後一集《東張》便無聲消失。

「話冇喊就呃你」

前日是陳倩揚約滿無綫的最後一日,她早上帶大仔陳羲廷一齊返公司交證及與TVB Buddy影相。日前倩揚在九龍灣受訪,透露未被「革走」前,亦有與公司高層傾續約,但最後不歡而散。她說:「其實又冇大吵大鬧,佢哋有同我傾續約,只係大家方向唔啱,咪走囉。」知道自己衰甚麼?她說:「佢又冇咁講,佢哋話想換新面孔同轉吓模式。咁我都明白,冇一份工永遠係你,唯一可以講,係佢哋覺得生咗BB、做咗媽咪,你都可以唔使咁搏吖!呢個係我唔太認同,香港咁多職業女性都要湊仔,唔通個個都唔應該返工呀!」
陳倩揚直認接到電話通知「冇得撈」《東張》一刻,傷心爆喊,她說:「話冇喊就呃你,但老公好理性同我分析,安慰我,係時勢得出咁嘅結果,但唔一定負面,可能有其他機會等緊你。」是否權力下犧牲品?她笑笑口說:「呢樣要留畀大家食花生,但如果我唔係選美出身,冇《東張》呢個學堂,我亦唔會有呢個認受性同知名度。」她表示沒有怪責「有線幫」,認為每個朝代換班底都好正常。

相關新聞:【情定校園】異地戀險分手

監製不准錄用

據悉倩揚因為不肯續約,加上爆seed言論,被高層下達封殺令。不少劇集和綜藝節目監製均收到通知,不得錄用陳倩揚,所以近半年,陳倩揚開工率極低,只在劇集《完美叛侶》演出兩場閒角,及在《與諜同謀》做羅嘉良前妻,加埋不足10場戲。前晚倩揚在電話中被問是否遭封殺?她說:「我冇聽過,呢大半年都專注讀芳香療法同網上教人煮餸。」工作量大減?她說:「呀……咁呢個都係事實,last day見番手足同事,記番好多以前嘅嘢,大個女要向前看嘛。」
採訪:嵐山
場地提供:I's Land Cafe
化妝:Heidi Lee @ Heidi-Makeup.com
服裝及鞋履:Stunnging Sgirls、House of Avenues

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載