蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年08月17日

嗌乒乓一哥黃鎮廷茂利
蘇施黃亂彈港將 全城鬧爆

154,541

言論惹火的商台節目主持蘇施黃經常辣火頭,前日她在節目中形容香港乒乓球一哥黃鎮廷為「茂利」,又批評香港單車隊戰衣醜樣,結果因失言犯眾憎。黃鎮廷、香港單車代表梁峻榮、香港前專業劍擊代表李忠民均發聲請她尊重運動員,大批網民更要求阿蘇道歉,昨阿蘇霸氣回覆:「我係人都叫茂利,包括自己。」

相關新聞:【利益當前】為獎金呃觀眾

里約奧運進行得如火如荼,「牛下女車神」李慧詩昨晚再戰場地單車女子賽,全港上下一心撐港隊之際,現年61歲的商台主持蘇施黃,前日在節目《大玩派》竟狠批香港單車隊戰衣,又用「茂利」形容乒乓球一哥黃鎮廷,結果辣㷫大批支持港隊的熱血港人。

不悅Polo「啡」開

憑惡死形象、罵人不留情面主持風格深入民心的蘇施黃,前日在節目批評:「真係𤷪𤷪哋,咁香港打乒乓波,係藍色嘅polo shirt,你睇吓呢條『茂利』叫乜名?你睇佢『呢啡』到呢,我着polo shirt就一定扣最底嗰粒鈕,因為係咁先靚啲,呢個阿乜,黃鎮廷呢,佢係全部『啡』開晒,真係肉酸到呢,可唔可以教吓佢哋點着uniform呢?」
節目出街後,香港前劍擊代表李忠民在fb撰公開信給蘇施黃,讚黃鎮廷是香港的精英運動員,並不是「茂利」;而黃鎮廷接受傳媒訪問表示,不扣鈕打球會更舒適,請她尊重運動員,不要隨便拿運動員開玩笑;香港單車代表李峻榮則指灰色戰衣有隱形作用,進攻更容易;大批網民更踩到蘇施黃的facebook主場,要求她道歉。

相關新聞:【奧運暗箭】鄧達智揶揄中國隊服

區旗似乳暈

昨日蘇施黃透過短訊回覆本報:「不要寫錯字——瞀里,這是我2005年去撒哈拉沙漠team的名字,參加馬拉松賽,如果你時常聽我節目,我係人都叫茂利,包括自己。」問到會否解釋呢?她霸氣回覆:「不需要解釋我為甚麼天天睡覺,天天起床。」對於李峻榮的回應指戰衣灰色的原因,蘇施黃澄清:「我都唔係話灰色,我係話他們放區旗的位置不妥當,淺灰的葉,一瓣在左胸前,一瓣在右胸前,仲要中間有粒星,看落像乳暈。」並重申只是認為polo shirt沒扣鈕「呢啡」。
至於李忠民給她的公開信,蘇施黃抵死表示:「佢唔係寫畀我,我的名字係蘇施黃。」原來李忠民寫錯蘇施黃的施做「絲」!而昨日她在節目刻意說:「各位茂利好,我成日都叫人茂利,冇意思嘅,我叫自己都係茂利,所以冇嘢講嘞。」
採訪:皓騫

【網民反應】「唔係你老友呀」

狠批港隊戰衣惹禍的蘇施黃,其facebook被網民洗版狂轟。
Stephanie Yung:
希望你慎言。尊重自己的修養,尊重運動員付出的努力及堅持。
Dennis Fong:
甚麼「茂利」係你口頭禪,咁如果粗口係主持人口頭禪,咪可以隨便講出來?你要講「茂利」都要睇吓對象吧,佢哋唔係你啲老友呀!
Helen Chung:
自由講,唔愛可以唔好like,冇人逼你的,唔好阻擋我們粉絲的溝通。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載