› 選擇地區
三藩市
紐約
洛杉磯
其他美國地區
香港 台灣 北美
 
2016年08月18日

【add】紅人主場:
19歲Hilary 幸運星二代

近年「贏在起跑線」成為大家經常談論的話題,上山詩鈉的19歲囡囡Hilary,盡得媽咪的優良DNA,更被大家封為「最索星二代」,先天條件已經贏開巷,「我覺得自己好幸福好多機會,可能好多人搵工或者想做呢行係難少少,但我唔會覺得自己贏咗,只會覺得自己比其他人幸福。」現在於美國求學的Hilary,早前趁暑假回港時接受了《add》訪問,於拍攝期間盡現開朗直率性格,再加上其甜美可人笑容,絕對是「冇得輸」。

統籌:林妙萍
造型、撰文:陳蔚渝
攝影:周樂恒
攝錄:陳志嵐
化妝:Angel Wong
髮型:Ziv Lau of Queen's Private i Salon

Hilary與母兼父職的上山詩鈉一向感情要好,二人更經常都被拍到好像孖公仔一樣,問到有否因為去美國留學,與媽咪分隔兩地而感到不捨,「都有少少唔捨得,不過佢成日都會嚟探我,所以唔會特別覺得好唔開心,又或者好想返屋企。」

我不是ABC

雖然在美國波士頓的校園生活相當忙碌,不過Hilary表示因為將時間分配得非常好,既有時間做功課,也可以擁有私人時間,更會經常趁周末與朋友周圍去,「我覺得自己大個唔會住喺美國,我𠵱家住喺嗰度係一個opportunity,如果日日匿喺房會覺得嘥咗,所以我得閒都會周圍行吓睇吓。」
雖然自小在國際學校讀書,形象鬼妹仔,不過她否認自己是一名ABC,「有好多人認識我之後會覺得我嘅諗法有少少美式,其實我大部份時間都喺香港,就算𠵱家喺美國返學,其實我好近唐人街,所以成日都會講中文。」相比香港與美國,Hilary對兩個地方的印象很不一樣,「香港有好多由細識到大嘅朋友,嘢食又多啲,比較modern,有啲似New York,不過因為我住喺Boston,有時會有少少悶,香港乜都快,Boston就好慢,所以你一去到就會覺得個life好放鬆。」

半投身娛樂圈

Hilary雖然仍然是學生一名,不過都可以說她已是半投身娛樂圈,因為單單是回港放暑假期間,也經常獲邀出席品牌活動,又替品牌拍硬照,對於完成學業之後會否考慮全身投入娛樂圈,「其實都未知 ,仲要讀多3年書,可能讀完之後再睇定啲先。」
從Hilary在Ig 分享的日常生活當中,不難發現她是個愛打扮、愛時尚的人,「我都幾鍾意fashion,不過香港比較多focus喺beauty,所以我幾開心喺美國,咁近New York,咁近fashion嘅地方。」而且也可以見到她經常名牌袋揹上身,不過原來大部份手袋都來自媽咪,「佢有好多vintage手袋,佢𠵱家好鍾意啲大袋,所以佢以前買落嘅細袋,我就可以全部攞晒嚟用。」

屋企人第一位

之前與中東裔男友拍拖,不時在網上放閃的Hilary,回復單身已經一陣子,對於擇偶條例,她認為最重要是愛錫屋企人,「我好注重屋企人,要nice,唔係鍾意晚晚出街出去蒲。」揀男友亦沒有局限是外籍人士,「亞洲人都OK,不過最好近啲,如果同個香港男仔一齊,佢住喺香港,我住喺美國,咁好難㗎嘛。」問到對婚姻方面可有憧憬,「咁又冇嘅,24歲啦,最快都要嗰個年紀先會想結婚。」

香港潮語零概念

Hilary雖然在香港長大 ,不過自細在國際學校讀書,現在到美國升學,所以就對潮語一點都不熟悉,訪問期間我們刻意考她,「其實我唔係好識啲香港潮語,我淨係知道公主病、公主癌同埋港女,食好西即係好似foodie咁,我淨係聽過好多人話𠵱家好多女仔有公主病,即係好奄尖,港女其實我都唔係好明,其實我唔係好識呢啲新潮詞語。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載