› 選擇地區
三藩市
紐約
洛杉磯
其他美國地區
香港 台灣 北美
 
2016年08月25日

【add】紅人主場:蒙嘉慧
我的快樂之道

人生並不單單只是一場戲,因為每個人也可能擁有多過一個角色。現年43歲的蒙嘉慧(Yoyo)由拍電影到拍劇,一直演盡無數角色,直到三年前榮升鄭太,她人生又出現多了一個角色,成為鄭伊健人生中的女主角。與伊健一起差不多十個年頭,近年更罕有地晒恩愛,「其實我覺得冇乜夫唔夫妻相處之道,兩個人相處嘅目的只係希望對方開心,人大咗就會開始明白。」


統籌:林妙萍
造型、撰文:陳蔚渝
攝影:周樂恒
攝錄:陳志嵐、林德雄
化妝:Angel Wong
髮型:Harry Lau

現在屬於自由身的Yoyo,可以選擇最適合自己的劇本和角色去演,非常享受現階段,「我𠵱家幾enjoy得閒做吓嘢,跟住可以學吓嘢,做吓自己嘢,我覺得呢個模式幾好。」

相處最緊要開心

雖然Yoyo與伊健各有各忙,有時候一星期有數天分隔兩地,不過對他們感情零影響,Yoyo更笑言:「如果我唔係咁忙,第日佢喺第二度拍戲,我都可以飛過去探佢,如果嗰個地方好玩嘅話。其實又唔可以叫老夫老妻,但好natural,亦唔會諗幾日冇見要見多啲,當然如果佢返嚟可能會做多少少嘢,可能以前唔會日日煮早餐,咁佢返嚟我會煮番密啲。」
伊健之前接受《add》訪問時,曾講過越簡單的事越容易記得,很多事情都是自自然然,身為另一半的Yoyo亦同樣愛簡單,認為兩人相處的目的,只是單純的希望對方開心,「我哋一定會有面對困難同逆境嘅情況,但我哋要本住嘅心情唔係要對方幫自己解決問題,係希望可以分享難處,但最後責任都喺自己度,唔好諗住有隔籬嗰個就可以倚賴,調番轉如果出發點係想對方開心,對方亦都咁做嘅話,我覺得呢個相處之道永遠都啱。」

演員世界無休止

由拍廣告入行,投身大銀幕,再到逢拍劇都是女主角,Yoyo雖然入行已經超過20年,不過這一刻對演戲的熱愛仍然不減,「其實我係唔會放棄,因為我始終好enjoy做演員呢個過程,但都要depend on有啱嘅劇本,所有嘢都要夾到。就算第日搵我做阿媽我都會好想,可能一來自己係拍戲出身,我始終覺得演員嘅世界冇停嘅時候,胡楓可以80幾歲都拍緊嘢,點解我哋有資格同有需要去停?但真係需要天時地利人和,呢樣嘢唔到我哋控制。」
隨着年紀、經驗與閱歷的增長,Yoyo坦言對角色的渴求也有改變,「𠵱家冇以前嗰種想設定自己做乜,反而係就算𠵱家畀我做番同一個角色,拍番以前嘅劇,都可能成個感覺會唔同,一來人大咗,閱歷會有唔同,又或者睇番以前嘅演繹方式,你又會想試另一個。」

自己跌低再起身

眾所周知Yoyo愛做運動,與伊健最初也是因為羽毛球結緣,不過她近年變得比較錫身,「運動對我嚟講係娛樂,但相對以前一得閒就衝去打羽毛球,我係錫身過以前,因為以前會整親。呢兩年做少咗運動係因為之前去日本滑雪整親韌帶撕裂,跛咗成大半年,𠵱家先開始好番,高踭鞋都成兩年冇着過,對於一啲戶外運動我會諗清楚先做。」不過原來Yoyo也屬於好勝派,本着不服氣的性格,早前已經再去滑雪向自己證明,「我覺得我喺邊到跌低,就要喺邊到起身。」

【好食開心Share】

早前曾被拍到明顯心廣體胖,立即努力keep弗的Yoyo,在微博上載得最多的一定是食物相,「其實我𠵱家比以前對食嘢係更加鍾意咗,可能以前拍緊劇冇咁多時間諗想食乜,盡量食飽去開工,但𠵱家有時間,所以對食物要求會高啲,有時會諗吓今日想食乜菜,乜都想試,另外對食材呢樣嘢,可能去搵食物,其實係家庭主婦要做嘅嘢,邊檔麵包好食啲,邊度抵啲,又或者逢星期幾嚟嘅食物會新鮮啲。我嘅性格係如果覺得好食,好想同大家share,所以多咗廿磅返嚟。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載