› 選擇地區
三藩市
紐約
洛杉磯
其他美國地區
香港 台灣 北美
 
2016年08月26日

【馮仁昭四圍超】親解劇院建築美學
邵仲衡曾江促保育皇都

邵仲衡同曾江都有去到北角皇都戲院對面天台拍片,力撐保育行動。互聯網圖片

香港保育被狠批不足,有民間團體自發保育行動,聯署爭取政府將前身為52年興建嘅璇宮戲院,至今擁有64年歷史嘅皇都戲院大廈列為一級保護建築。Walk In Hong Kong活現香港仲喺facebook網頁,上載「大佬孝」邵仲衡同曾江身處皇都拍片呼籲。

最緊要活化

當年理工設計學院畢業嘅邵仲衡喺短片話:「留意佢個頂有棚嘢,劇院唔需要有柱,香港值得有舊建築物保留做劇院。」邵仲衡覺得全因累積點滴,造就香港成為文化熔爐。建築系畢業嘅曾江亦力撐保育皇都:「嗰時好多大戲院,唔係𠵱家蚊型戲院,皇都嘅建築好特別,用咗力學。」
馮仁昭噚日打畀邵仲衡,佢話:「全世界對呢啲係寶,買少見少,拆一件少一件,聽講古物古蹟委員會有人話冇乜人嚟過呢度睇過戲,所以唔值得做保留,幾荒謬。」邵仲衡認為保育最緊要係將舊建築物活化,可以將舊址改裝成唔同場所,食肆或超巿都得,佢話:「外國人嚟就係想睇有特色嘅嘢,如果全部玻璃幕牆新大廈又有乜興趣?」
邵仲衡上周去咗意大利彿羅倫斯同米蘭,意大利中部前日凌晨發生6.2級地震,死傷無數,邵仲衡嘆息死傷,同時大嘆意大利好多古蹟喺地震中倒塌。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載