› 選擇地區
三藩市
紐約
洛杉磯
其他美國地區
香港 台灣 北美
 
2016年08月26日

無綫夥愛奇藝合作拍《創世紀3》「慶」香港「回歸」20周年?

知唔知最鍾意翻dup無綫舊劇(特別係經典嗰隻)嘅人,係邊個?

咪就係無綫自己。

由劇集改拍成電影(例如搵MK活地亞倫拍嘅《十月初五的月光》,前面加四個字——「毀童年版」),到劇集翻拍劇集都有(如《無雙譜》)……依家,無綫又嚟複製自己,仲係「中港合拍」嘅——《使徒行者2》,同埋《再創世紀》。

又係含尤加利葉樹熊出動嘅時候。大台昨日拉大隊去北京出席《TVB 2016皇牌影視劇及業務發布會》及《愛奇藝TVB策略聯盟》,同愛奇藝簽署合作協議,將90年代經典劇《創世紀》開拍續集《再創世紀》。杜之克接受大陸傳媒訪問時,就話《再創世紀》將會喺2017年年底播映,依家係籌備劇本階段,仲話今次呢套劇會作為「香港回歸20周年、TVB 50周年獻禮。」

講真,《創世紀》兩輯由葉榮添千辛萬苦出咗部「電子寵物機」創業講起,成個劇「底庄」除咗家族恩仇之外仲包括港人如何自力更生掙扎求存,一個咁勵志嘅「本土」故事——不得不提仲有許文彪講香港樓價嗰段。但依家,《創世紀》變成中港合拍劇、改個名叫《再創世紀》,內容由道地香港人故事,變成新一代嘅大陸、香港人拼搏奮鬥史,仲話拎嚟「慶回歸」,咁點解唔索性開過套新劇?

而且,當日《創世紀》嘅一班演員,如羅嘉良、郭晉安、古天樂、陳錦鴻、郭可盈、陳慧珊等等,已經亦已經相繼離開大台,要搵返原班人馬演出,呢個機會真係微乎其微,於是大台今次搵咗黃宗澤、陳展鵬、胡定欣、梁烈唯、黃德斌等人再夾啲大陸演員演出……

早於今年六月,已有消息指無綫將開拍《創世紀》第三輯,又稱余詠珊斟洽羅嘉良「歸位」參演,但有指羅嘉良對劇本及對手均有要求,且出年檔期排滿,所以傾唔成。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載