› 選擇地區
三藩市
紐約
洛杉磯
其他美國地區
香港 台灣 北美
 
2016年08月31日

【馮仁昭四圍超】談康堤出國升學 
Eason:香港讀書難

陳奕迅(Eason)噚日去咗維園,以推廣大使身份出席賽馬會樂動網球活動,同場仲有財爺曾俊華,Eason喺台上玩轉球拍,笑言7歲就學網球:「以前見到林子祥、張學友打網球,覺得好有型,我就去打網球。我以前短髮,梳側邊界同孭住球袋,有啲人都認錯我係張德培。」
Eason𠵱家放大假成日做運動,除網球同羽毛球外,仲有跟黃佩霞學瑜伽,身形終有番少少輪廓:「做運動真係好爽,同埋冇壓力,其實我冇輕,都係170幾磅,以我高度,應該係150幾磅,我今年42歲,身體好似螺絲一樣會生銹。」

爆囡囡懶

Eason講到囡囡康堤唔識打網球,佢話:「公開講佢會好hurt,不過佢音樂同唱歌係好,佢手長腳長腰長,會論盡啲,懶呀,似我,所以靜態啲會好啲,佢有跟阿徐(徐濠縈)跑步,佢好自律。」提到開學,有傳康堤會去外國讀書,Eason好大反應話:「點解我唔知?香港幾好吖,唔辛苦,但係難,不過難係好,因為係好學校。去外國都想,見識吓世界,又可以獨立,等佢中三、四,有自己朋友先。」
問到好友陳子聰康復情況,Eason就話對方好似OK,但未知幾時出院,有提議佢搵埋子聰做運動,佢話:「佢應該未得,休息吓先。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載