› 選擇地區
三藩市
紐約
洛杉磯
其他美國地區
香港 台灣 北美
 
2016年09月01日

【《蘋果》專訪】撐仔選港男 話說當年
胡越山怨紅唔起:我係寸㗎

無綫「銀河十星」胡越山最近被本報發現原來是應屆候選港男胡㻗的爸爸,他早前曾表示支持兒子參選。退出演藝界多年的胡越山,前日在自己經營的按摩店內接受本報訪問,憶述在無綫的歲月,透露當年先讀動作演員進修班,之後做青年大使,公司都給予他不少機會,曾參演《皇家鐵馬》、《原振俠》等劇集,可惜最終發展不理想。

相關新聞:搏晒命都紅唔起胡越山跳樓唔用替身

拍劇搏命唔識死

胡越山坦言當年有不忿:「以前有咁諗,人哋講乜唔會聽入耳,因為覺得自己得,係有得戚㗎、寸㗎,覺得自己得嘛,𠵱家諗番梗係知唔得,係自己問題。」他又謂:「嗰時個個都好搏,自己當然都想紅想出位啦,唔識死㗎,有次拍劇要喺30幾呎高跳落嚟都唔用替身,上到去先驚,啲紙箱加榻榻米,就咁跳落去,跳完導演仲要唔收貨,再跳一次紙箱都散晒,我成隻腳叉咗落去,好彩冇事。」
離開娛樂圈,胡越山曾轉職做地產,他自言向來不擅交際,當年做了9個月都沒有做過一宗交易。他說:「我已經好努力,由cold call口窒窒,到夠膽同客人、業主溝通,但係做咗9個月都開唔到單,人哋唔炒我都打算自己走,點知有晚就畀我撞到個walk in客,佢買咗一間700幾萬嘅樓,佣金都幾好㗎,之後都做得幾順利,但做咗3、4年我又冇做,之後就開舖頭喇。」

低調娶胡㻗媽咪

有指他在娛樂圈多年都是緋聞絕緣體,胡越山笑說:「我嗰時已經有啦嘛(胡㻗媽咪),唔會諗咁多嘢,同埋嗰時拍拖係大忌,所以都好低調,結婚都冇擺酒。」問他會否再婚?他認為婚姻只是一紙婚書,最重要開心。
採訪:鄉奈仁

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載