› 選擇地區
三藩市
紐約
洛杉磯
其他美國地區
香港 台灣 北美
 
2016年09月14日

【首爾直擊】三星Note7會爆炸
韓男:送禮畀人等於送炸彈

三星(SAMSUNG) Galaxy Note7近排夠晒「爆」,由於有供應商提供問題電池,令部分Note7手機電池「轟呀」爆炸,搞到要全球大規模回收。動主播阿仙喺韓國首爾直撃最新情況,喺弘大三星專門店裏面,阿仙發現早幾日呢度仲玩到嘅Note7示範手機,拍攝當日已經熄晒機,而且當地已經暫時停售Note7,如果你喺韓國入咗部Note7咁「開心」,9月19日起可以換機啦。阿仙仲訪問到當地市民,韓男Han Kyeol Le覺得好丟架,佢話:「危險,怕電話會爆炸,送禮畀人就等於送炸彈!」瞓覺時都會將電話放遠啲。

至於喺香港,動主播表妹去到旺角,大部份市民都覺得Note7「機如其名」,話想送佢畀「689」喎,高小姐:「真係有啲X,我連佢出咗Note7都唔知,我仲用緊Note3。」而鄔先生就話:「如果我有部Note7,我會送比前度女友,唔知佢而家過成點啦,但我會希望佢會有事故發生啦。」←巧黑心喎!!

講到手機,表妹當然要去拜訪「先達手機交易所、亞皆老街及太子區首席分析師」Lo哥(劉志剛)啦,估唔到Lo哥話不嬲都對SAMSUNG冇咩信心,「個個都驚啦, 始終都俾咗幾千蚊出黎買部機,水貨暫時唔收住,香港版就冇問題。」

此外,根據香港三星官網聲明表示,港澳地區發現有問題嘅Note7少於500部,9月2日或之後出售嘅Note7,已經冇採用問題電池,可以安心購買咁話。唔放心嘅市民可以自行檢查手機IMEI號碼,如果發現中招,品牌客戶服務中心將會安排換機。

想知港韓兩地市民對Note7出事嘅睇法,就快啲去片啦!

韓國:
採訪:阿仙
攝影:李錦鏵
繙譯:卓惠媛(Joyce)

香港:
採訪:何宛珊(表妹)
攝影:馮峰

後期:Roy、陳家文
編審:陳家文、懷鈺

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載