› 選擇地區
三藩市
紐約
洛杉磯
其他美國地區
香港 台灣 北美
 
2016年10月01日

被唱開門利是出手低 張名雅開group捉鬼

結婚,原本係一件值得恭喜同祝福嘅事,但因為一組銀碼——$3,800,引發茶杯風波,當事人張名雅同律師老公蔡錦豪,被指喺接新娘環節所封嘅開門利是,同姊妹期待嘅有啲啲落差!

眾所周知,開門利是嘅銀碼,除咗新郎新娘外,就只有新娘一班好姊妹會知。撇除兩位新人,剩番落嚟嘅,就只得張名雅陪嫁嘅9位姊妹。而呢件新聞嘅源頭,係來自一份周刊爆料,照推斷,爆料姊妹好大機會係平時同傳媒有接觸嘅藝人。

望番張名雅當日陪嫁姊妹陣容,身為藝人嘅,總共有6位:唐貝詩、何傲兒、譚凱琪、陳庭欣、節目主持李靄璣同動作演員何佩珉。而據當日有份在場嘅人透露,張名雅老公接過新娘後,有人目睹有位姊妹,偷偷企埋一邊,輕輕打開利是封,瞄咗一瞄……

喺結婚前,張名雅早將兄弟姊妹團加入WhatsApp group chat,方便傾婚禮細節。日前新聞一出,一眾兄弟姊妹即喺WhatsApp中,抽絲剝繭討論「捉鬼」,更已鎖定目標。

對於「捉鬼」一事,張名雅回覆傳媒時,語氣平靜咁話:「其實我都好搲頭,新聞點解會咁講?其實除咗開門利是,我嗰日都有俾佢哋(兄弟姊妹)啦,我哋爸爸媽媽都有俾,我覺得唔好講錢啦,講錢傷感情,但實情唔係$3,800,係五位數!而我亦都好相信我班姊妹,或者新聞想有好收視,先會咁報道啦!」

至於被指人紅先派帖,張名雅就一口氣澄清話:「我12年加入公司,做過主持、司儀、拍劇、唱歌同綜藝節目,同我合作過嘅同事好多,親戚、朋友、平時拍完劇會約出嚟嘅,要請我都盡量請,但老實講,如果要請晒,有少少難。

「其實有啲朋友我有請,但當日嚟唔到嘅,大家唔會知,好似黃心穎咁,佢有事嚟唔到,但佢好好,有嚟俾人情;至於胡定欣,佢嗰日生日,都專登嚟俾人情我,我同佢連續做過3、4套劇,覺得好有緣份,所以先請佢,絕對唔係乜嘢人紅先請、唔紅唔請囉!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載