› 選擇地區
三藩市
紐約
洛杉磯
其他美國地區
香港 台灣 北美
 
2016年10月20日

【馮仁昭四圍超】當年被指棄洪欣母子
莫少聰晒抱仔相反擊

莫少聰前日突然喺微博爆seed,講返佢同舊愛洪欣嘅恩怨,當年洪欣話同聰仔生咗個仔莫鎬廉(現名張浩鋒)之後,兩母子冇人理。聰仔叫洪欣捫心自問,當年嘅事,真係全部都係佢錯咩?仲話佢沉默唔代表佢唔敢講嘢。
到噚日聰仔攞咗當年抱住剛出生嘅囝囝莫鎬廉相,佢喺微博上載咗兩張相,日期同樣係2000年8月18日,即係囝囝出世後兩日,當時見到莫少聰抱住囝囝,另一張係一名中年女子抱住莫鎬廉,估計係聰媽,莫少聰留言:「好吧,第一次公開兒子的這些照片,滿足大家做偵探的願望,希望每個人都向柯南學習,發現事情背後的真相。」
當年傳聞係洪欣懷住莫少聰嘅BB,冇結婚最後分手收場,仲話洪欣當年孤身去加拿大分娩,聰仔背負住負心人嘅包袱。近日聰仔同孫雪玲離婚,接受訪問時話當年外界一直話佢狠心唔理個仔,事實係聰媽一直好錫孫仔,不過聰仔同洪欣冇緩衝嘅橋樑,令佢哋不相往還。

慘食死貓

據知情人士透露莫少聰食咗10幾年「拋妻棄子」死貓,該名人士又話洪欣大肚時已經同聰仔同居,到洪欣入院產子,聰仔仲陪埋入產房,一直都喺佢身邊,所以會有呢張抱仔嘅相出現。但有一日洪欣突然抱走個仔人間蒸發,之後就傳出聰仔唔理佢哋兩母子,該知情人士話:「當時聰仔搵極都搵唔到兩母子,佢又為咗個仔,所以冇去爭辯選擇唔出聲。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載