› 選擇地區
三藩市
紐約
洛杉磯
其他美國地區
香港 台灣 北美
 
2016年10月22日

46歲生日派對爆Seed
古仔半醉直播:我希望ViuTV個乞兒...

【ViuTV風波】近日ViuTV因為誣衊學運領袖王丹和港大學生會前會長馮敬恩,在拍攝《跟住矛盾去旅行》第二輯時擅自安排記者活動及發表港獨言論而被全城怒插。想不到古天樂前晚慶祝生日時,飲到半醉的他對住facebook直播忽然爆seed:「我希望ViuTV個乞兒呢……」昨日古仔出席活動時解畫,澄清乞兒其實是指他朋友為ViuTV所演角色,希望外界不要誤會。

相關新聞:【6億身家】萬呎倉儲1:1模型

古天樂昨日46歲生日,其一班好友包括容祖兒、劉浩龍、吳君如、林峯及古仔昔日在無綫同期受力捧的「五虎五美」成員古巨基和傅明憲等,前晚齊齊為他慶祝生日。與去年一樣,祖兒於fb直播古仔生日派對過程,着在場人士送上祝福,當古巨基唱完兩句《當年情》後,古仔即謂:「好啦,歡樂嘅時光過得特別快,又係時候講拜拜,多謝。」似不欲繼續直播。

祖兒大嗌好驚

不過,祖兒未有中止直播,當劉浩龍笑住祝福古仔在2018年演唱會成功後,飲到半醉的古仔卻突然爆seed說:「我希望ViuTV個乞兒呢……」現場頓時嘩聲四起,一味儍笑的古仔隨即補鑊說:「係呢……係飛黃騰達嘅!」祖兒直言:「好驚呀。」也有在場有人大叫:「影壇必有巨變呀!」更有人哼了《男朋友》歌詞幾句,祖兒便以「場面非常混亂」來結束直播。
ViuTV近日因誣衊王丹和馮敬恩於拍攝《跟住矛盾去旅行》第二輯期間,擅自安排記者會及發表港獨言論而引起軒然大波,被全城怒插後昨晚終於道歉。但古仔從未有與ViuTV合作,前晚他突然爆seed鬧ViuTV乞兒,實在令人莫名其妙,對於古仔言論,ViuTV公關部王小姐昨日在電話中表示:「冇回應。」

相關新聞:【是非不斷】林保怡轟ViuTV過橋抽板

「下次唔好live」

古仔昨晚出席Fendi廣東道旗艦店開幕典禮,被追問前晚為何指ViuTV乞兒?古仔明顯有備而來:「個朋友話畀我知,接拍ViuTV一個節目,客串個角色,開頭佢同ViuTV講冇期,就唔啱時間,點知ViuTV就咗佢幾次都就到個期畀佢,我就問個朋友『乜個節目好重要嘅咩?個角色你做啲乜?』朋友就答我係做乞兒,我就話『咁你飛黃騰達啦,可以憑個角色上位。』我個朋友唔係圈中人,所以我冇開名講佢。乞兒係我朋友嘅角色。」何以突然如此興奮?古仔解釋:「佢唔係圈內人,又有得客串係好事,而且就幾次個期都就到畀佢。」
問可擔心前晚言論惹人誤會?古仔說:「係囉,我噚晚講完都即刻唉……」會否怕ViuTV老闆李澤楷誤會及覺得失言?古仔說:「係呀!言語上唔好意思,希望大家唔好誤會,我只係講朋友角色係做乞兒。」以後會否不敢玩直播?古仔說:「下次都係唔好live喇!飲得開心得滯唔知講咗乜。」至於他生日願望是身體健康,並謂昨晚與家人食飯慶祝。
採訪:卓寶花

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載