› 選擇地區
三藩市
紐約
洛杉磯
其他美國地區
香港 台灣 北美
 
2016年10月22日

【我無樓,但我很傑出】
80後唔儲錢唔買樓 搞慈善窮遊40國家

「我睇過好多地方嘅日出、日落同星空,最NO.1係柬埔寨嘅垃圾山!」遊歷超過40個國家嘅80後少女Sonya,喺柬埔寨垃圾山見到最難忘嘅片段,「日頭啲人好辛苦搵食,當迎接日落,好快入夜,感覺好無希望,但係跟住望到好靚嘅星空,迎來第二朝嘅日出,原來喺一個最臭、最爛、最差嘅地方,會見到最有希望嘅一幕!」

Sonya啱啱結束咗5個月嘅Backpack旅程,遊歷咗中亞、伊朗、土耳其等地,佢話好多人羨慕佢旅行唔係以日計,係以月計,「我同羨慕我嘅人講不如交換吖,佢哋唔制o架,因為我係有自由,但係放棄咗穩定。」喺香港,要追求同香港人不一樣的價值並不容易,但喺世界,Sonya遇到好多比佢更瘋狂嘅人。例如喺塔吉克遇上一家三口嘅阿根廷人,父母旅行咗14年半,「當香港人話要贏在射精前,佢哋個仔就真係贏在射精前,唔止喺旅途上出世,得22個月大已經跟父母環遊世界。」

環遊世界都可能係你嘅夢想,好多人諗住儲一大筆錢退休先去,但係Sonya話根本唔知自己幾時死,而且旅行同錢無關,「首先你真係要無家庭負擔,至於自己嗰部份可以好慳。」好似喺塔吉克同阿富汗國界嗰度,可以揀用200美金搭車,但係Sonya就揀行一個禮拜,「我唔只係去旅行,係喺世界生活。」

Sonya話自己從來儲唔到錢,用晒嘅時候就做freelance,寫稿、影相、拍廣告等,賺到一萬兩萬蚊又再去旅行。Sonya話有朋友擔心佢老來乞食,「乞食咪乞食囉,同埋我年輕嘅時候擁有呢啲經歷同寶貴嘅回憶,我好有信心係唔會令我將來乞食!」

Sonya話越多去旅行,越令佢知道世界好多出路,「唔好畀既定嘅框框,框死自己,你可以揀你自己行嘅路。」而Sonya就揀咗行慈善之路,喺2013年成立慈善機構i-Action。當有傑青話唔睇戲、唔social,29歲供完層樓就傑出,但係Sonya唔儲錢 、去旅行,29歲服務山區村民起咗幢樓,都唔敢話自己傑出!

喺香港買樓,Sonya覺得一啲都唔值,「我唔想死嗰刻,原來仲攬住層樓,但係又未供晒!」佢話如果有500萬買樓,不如分一半出嚟畀有需要嘅人,已經做到好多嘢。好似喺過去兩年,Sonya籌咗12萬為內地一個麻瘋病康復村涼山,起咗個飯堂畀小朋友食飯,「佢哋本身喺露天地方踎喺地下食飯,有一日落毛毛雨,啲水滴落個食物盤度化開,嗰一幕我到o依家仲好記得!」

為咗令小朋友有瓦遮頭,做過NGO災難管理嘅Sonya利用佢嘅經驗同熱誠,將朋友嘅善款轉化成磚頭。飯堂建成,o依家幫採蜂蜜嘅村民爭取公平貿易,教佢哋包裝、做副產品,希望佢哋可以自食其力。

可以為別人生命帶嚟少少光明,Sonya覺得係最美麗嘅事,不過做呢一切,佢都一再強調自己唔傑出,「好多人畀光環我,但係我畀到涼山村民嘅嘢好少,而且啲錢都唔係我嘅,係人哋捐嘅,我只係帶大家嘅愛心上去。」

i-Action【一行動】
https://www.facebook.com/IActionHK/

Sonya travel & photography
https://www.facebook.com/sonya.travel.photography/

場地提供:Something Wild 野玩山店
地址:灣仔英皇集團中心1樓
電話:2997 5233

記者:鄒倩婷(阿仙)
攝影:Kaman、峰
編導:Kaman
剪接:Roy

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載