› 選擇地區
三藩市
紐約
洛杉磯
其他美國地區
香港 台灣 北美
 
2016年10月30日

【朱晨麗着過絲襪笠頭】三個遊戲接走白雲

現年28歲嘅「神獸天使」白雲昨日同前港男江俊霖(Kelvin)喺尖沙咀洲際酒店延開38席舉行婚宴。今朝一早,新郎哥就帶住一班兄弟團到酒店接新娘,同為2011年香港先生嘅李晉強有份做兄弟,其他都係圈外朋友。

有份做姊妹嘅朱晨麗、陳芷尤、劉溫馨、于淼(Maggie)就花心思諗咗三個遊戲,第一個遊戲係要將一對絲襪笠喺兩個兄弟頭上,仲要打死結要佢哋用盡力拉開,喻意「永結同心」,有姊妹口多多講笑話﹕「對絲襪係朱晨麗着過㗎!」不過成班兄弟似乎唔介意,反而仲樂在其中。
第二個遊戲終於到新郎哥Kelvin出場,佢要腿張開,將爆谷放喺袴下,跟住其他兄弟就輪流做掌上壓食晒啲爆谷,都幾重口味。而最後一個遊戲就係要成兄弟飲晒成支伏特加,新娘子白雲好緊張,叫Apple要錫住佢老公,留番畀班兄弟幫手頂酒,結果李晉強飲得最多。而一班姊妹收到開門利是之後,雖然冇透露金額幾多,但大家笑晒口影合照,似乎都幾滿意。

相關新聞:低胸透視婚紗勁性感白雲嫁前港男「唔想只做少奶奶」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載