› 選擇地區
三藩市
紐約
洛杉磯
其他美國地區
香港 台灣 北美
 
2016年11月08日

葉翠翠大肚大躉大胃口
老公估係仔:BB要似我

【中環】現年35歲的葉翠翠去年閃嫁拍拖十個月、任建築公司副董事的周曉東(Raymond)成為人妻,婚後揚言會努力造人的她,終於傳來喜訊。本報前日拍到肚凸凸的翠翠拖實老公甜蜜出巡食自助餐,見她身形圓潤不少,一人食兩份,相當好胃口!同日翠翠率先向本報證實懷孕近四個月,她指做產檢仍未證實BB性別,但想要男嬰的老公問中醫「貼士」後,十分開心,更笑言BB要似自己。

相關新聞:葉翠翠陀B 4個月老公話係人生最開心事之一

尚有兩個多月便踏入雞年,繼車婉婉、張名雅及楊愛瑾先後宣佈陀B後,去年7月嫁給拍拖僅十個月、任建築公司副董事周曉東的葉翠翠,前日宣佈造人成功,將於明年添「雞丁」,她說:「係有咗三個幾四個月呀!因為老公怕BB小器,之前全部人都冇講,屋企人都係上一、兩個星期先知道。」
問婚後全力造人的翠翠,坦言等這天等了很久,她笑說:「屋企有好多驗孕棒,唔同牌子加埋有幾打,今次都用咗三個唔同牌子驗。」翠翠又說:「我一直都有調理身體,知道有咗好開心,呢個係上天送畀我嘅禮物,我喺生日前知道呢件事,而預產期就會喺老公生日前。至於呢個消息可以講得畀人知嘅日子,又咁啱係奶奶生日,所以呢份係送畀奶奶最好嘅生日禮物。」

老公感動到喊

翠翠又爆老公得悉她陀B好開心,她每次做產檢都堅持同行,她笑謂:「有次去做檢查,明明BB只得2cm大,老公已經話BB似佢,連醫生都忍唔住笑。」為了給老公驚喜,翠翠指當日她驗孕得知「中獎」後,未有第一時間通知老公,她說:「我忍到黃昏6點左右,我呃佢唔舒服,叫佢即刻返屋企,同時已經喺廁咗set咗個壇,放好晒啲驗孕棒,再寫住「I am pregnant」,我叫佢幫我入去攞廁紙,點知佢幾次都見唔到,見到嗰時就以為我整蠱佢,當知道係真,佢即刻感動到喊。」
採訪:小米
攝影:黃曉程、朱志聰

相關新聞:家中貓狗陪迎B

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載