› 選擇地區
三藩市
紐約
洛杉磯
其他美國地區
香港 台灣 北美
 
2016年11月14日

手術後休養 辭演舞台劇
鍾景輝微創治腸癌

79歲的戲劇大師鍾景輝(King Sir),由07年開始參演香港中英劇團舞台劇《相約星期二》,飾演患絕症的慕理教授,原定下月第21度公演,但他突然辭演要易角。據悉King Sir於兩個多月前證實罹患第一期大腸癌,猶幸發現得早,他昨日報平安謂已回家休養,其愛徒陳國邦說:「老師做咗微創手術,做完手術後幾日,已經可以落地,情況都樂觀。」

相關新聞:【能教能演】成立藝訓班 賞識發哥

鍾景輝近年忙於舞台劇《相約星期二》的演出,飾演患上絕症的慕理教授,劇中他對人生有另一種體會,「人生幾十年,好快就過,學懂死亡,才懂得生活。」其愛徒陳國邦則飾演迷失生活方向的明哲,他遇上慕理教授後,便相約每個星期二到教授病榻前聽教誨,重新學習愛、疾病和死亡。慕理教授勉勵晚期病人在餘下的人生舞台,好好演活角色,惟在現實的舞台,King Sir不幸確診患上大腸癌,無奈要辭演《相》劇於下月的第21度公演,以及停拍無綫處境劇《愛.回家之八時入席》。
據本報收到消息,King Sir罹患大腸癌屬第一期,猶幸及早發現,並已接受微創手術割除,現在家休養。King Sir昨在電話中聲線氣若游絲,問為何辭演舞台劇?他說:「我身體唔係好舒服,我啱啱做手術割咗個大腸。𠵱家好啲,冇大問題,已經出咗院喺屋企休息。」

情況樂觀精神好

陳國邦昨接受電話訪問,透露King Sir在兩個多月前定期檢查時發現患癌,即時安排做手術,上星期已經出院,切除後不需要化療,他說:「今次老師做咗微創手術,佢做完手術後幾日已經可以落地,唔需要人扶都可以行。可能講電話感覺比較弱,但我呢幾日去睇老師,見佢好精神,各方面健康情況都樂觀同好好,相信好快,老師可以重拾佢嘅電視或舞台劇工作。」
King Sir於《相》劇的角色現改由古天農代替演出,陳國邦稱:「當時知道老師有事,明白體力上要演出一個得兩個人嘅舞台劇會好吃力,就算我咁後生都好攰,所以劇團都搵其他演員代替。古天農先生雖然冇演出過,但佢係中英劇團藝術總監兼該劇導演,睇咗百幾次,今次選擇佢,我認為係最適合,除咗我同King Sir,冇人比佢更熟。」

相關新聞:李司棋:King Sir好有修養

演出超過150場

《相》劇曾於香港、澳門、北京、台灣、洛杉磯及多倫多等地公演,上周三,城市電腦售票網已發出演員調動通知,稱King Sir身體抱恙要辭演,可以安排退票。不過陳國邦表示不擔心:「呢套劇除咗演員之外,劇本係非常之好,今年已經係第9年演出,就King Sir嚟講已經超過150場。」
陳國邦之後再撰文,講述一件現實與舞台劇交叠的事,透露今次演出同時亦是他跟「明哲」道別的時候,他寫道:「慕理:如果我有多一個仔,我希望嗰個係你。明哲(心聲):如果我有多一個爸爸,我都希望嗰個係你。」足見師徒情深。
採訪:嵐山、魯吉

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載