› 選擇地區
三藩市
紐約
洛杉磯
其他美國地區
香港 台灣 北美
 
2016年11月15日

捱足22年首次開騷
趙學而爆喊發台瘟

從未被封過做樂壇天后的趙學而,等了22年才舉行兩場處女騷「我趙學而演唱會」,首場騷開賣時僅6分鐘被秒殺,前晚終於在九展揭幕,學而以日式歌姬look登場,惟唱完《難懂》後想說話卻咳了一咳,學而打趣自嘲:「好明顯我畀口水濁一濁,真係『自濁位』。」

相關新聞:同梅小惠不和抑鬱趙學而愛霆鋒夠真

「遲到好過冇到」

學而感慨說:「喺娛圈活咗20幾年嘅第一個演唱會,有時啲嘢遲到好過冇到呀。」她在個唱上兩度爆喊,當演繹完《你是你本身的傳奇》後,邊說邊喊:「多謝過往自己人世間經歷,每次唱呢首歌都喊,人生經歷高低起跌,我一世好似活咗七世咁。啲人成日覺得我好惡、好煩,其實我好易喊,係喊包。」
此外,學而唱出《輸給戀愛的女人》首段後,突然說:「不如嚟過啦,我唔好!啲歌改過晒編曲,年紀又大,又唔好記性!真係好大壓力㗎!呢度又多人,好似好分心咁,做live係咁㗎啦,唔得咪再嚟過囉!」
怎知重唱時再重蹈覆轍,學而𤷪 𤺧說:「黐黐哋㗎我真係,發台瘟!」阮兆祥即大聲安慰:「唔好嬲,飲啖水先。」觀眾都鼓勵:「實得㗎!」、「我哋唔趕時間!」學而嘆氣:「我都知唔趕,我都知實得㗎,咁𠵱家唔得嘛。」幸好唱第三次時終順利完成,全場拍掌。

拒唱《皆大歡喜》

最後學而踢拖出場,當年合演劇集《皆大歡喜》的阮兆祥、廖碧兒和鄧兆尊都在座,兆尊更帶兩位女友到場。祥仔大叫學而唱劇集同名歌,觀眾加入起哄,學而說:「開賣6分鐘,就係為咗聽《皆大歡喜》?黐線㗎!呢個世界好亂呀,媽!」觀眾再尖叫,學而終就範:「拖鞋十字步,Hey呀Hey呀Hey!呀Hey呀Hey!唱咗兩句啦,你哋好抵㗎喇!」
採訪:盧妹
攝影:陳俊強

相關新聞:拖兩個女友睇趙學而兆尊御女術揭秘

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載