› 選擇地區
三藩市
紐約
洛杉磯
其他美國地區
香港 台灣 北美
 
2016年11月20日

【蘋果動搞作】暴龍哥做侍應
鄭中基斟茶騰雞

鄭中基(Ronald)闊別紅館十年,申請到明年農曆新年檔期舉行個唱,本來只開1月28、29日兩場,因群情太洶湧,最後加開1月27日、年三十晚一場還「飛債」。Ronald趁未忙於演唱會綵排,日前變身「猛龍特種侍仔」跟《蘋果》到銅鑼灣一間餐廳踩場做侍應。

相關新聞:【有請暴龍哥2】啲客叫牛歡喜 鄭中基:你好多個西

諗過開火鍋店

一本正經拿着餐牌的Ronald,諗住招呼餐廳第一枱兩女一男的客人,豈料一眼就被認出,上完餐還被食客要求影合照。Ronald應付第二枱客時,又被食客認出,男食客還大叫問:「咦!暴龍哥?」雖然Ronald想死撐,但食客還擊:「唔係咁都認唔到呀!」
事後Ronald笑言:「我有進步㗎,仲快咗俾人揭穿。」他又自讚好叻,有推介客人食意粉:「穩陣就食肉醬意粉,或者野菌意粉,但佢哋兩樣都冇叫,叫西蘭花長通粉同西瓜汁,真係好西喎!」
Ronald指以前暑期工做過執貨倉務員,在外國讀書時也試過跟同學去婚宴唱歌助興,反而侍應未試過。
問Ronald替客人斟茶遞水有何感受?他笑說:「好大壓力㗎,最怕淋晒啲嘢去客人度,因為要單手托住個盤,所以見到有四個人嚟就好驚,因為會有四杯嘢飲。」問到可有興趣做飲食生意時,Ronald承認之前有計劃開火鍋店,他說:「初初諗住全部嘢都係生,準備個湯底就得,後來再諗吓做其他生意,諗吓諗吓到𠵱家都未做!」

個唱近三小時

談到即將舉行的香港個唱,正所謂十年人事幾番新,問如今開演唱會,心態跟以前有何分別時,Ronald直言感覺很不同:「以前當玩多啲,最緊要自己開心,𠵱家想做好啲,想唱多啲人哋鍾意嘅歌,所以今次嘅演唱會rundown都有2小時45分鐘。」他又事先張揚五歲囡囡梓喬會上台唱歌,又爆囡囡有「飲歌」:「佢係唱英國女歌手Adele嘅歌,但我估佢唔知自己唱乜,只係背晒歌詞。」
採訪:小米
攝影:馮峰、卓振輝、葉君海
場地提供:HMV銅鑼灣旗艦店
髮型:Horace Tse of hair play
化妝:Mon Chun
服裝提供:McQ

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載