› 選擇地區
三藩市
紐約
洛杉磯
其他美國地區
香港 台灣 北美
 
2016年12月13日

秋生周博賢開火
「廢話」「低票」互譏出局

昨日特首選委會選舉點票結束,有份爭奪文化小組(15席)的黃秋生和「樂壇長毛」周博賢皆敗北,兩個男人卻由選戰變罵戰,秋生寸爆周博賢經常廢話連篇,除了消費梁振英之外沒第二招,周博賢則反擊秋生提梁振英的次數比自己更多,更暗嘲秋生得票包尾致以安慰,結果被秋生狠插:「呢啲咪懶係禮貌嘅虛偽嘢!」

相關新聞:【本是律師】周博賢鬧Lancôme

特首梁振英上周五忽然宣佈放棄競逐連任,令特首選委會的選戰更激烈,昨日公佈點票結果,黃秋生和周博賢分別有份競逐文化小組,可惜鎩羽而歸,敗給由汪明荃、鄺美雲等組成的「文化共融小組」,秋生更得票包尾,他昨在facebook揞名寸爆周博賢:「我真係冇法再忍受聽嗰啲廢話,除咗攞梁振英嚟消費仲有冇第二招……人哋都話唔選咯,冇咗呢條反梁大計,諗過第二條橋啦,十下十下。」

藝發局選舉結怨

秋生和周博賢不和,始於今屆藝發局選舉,秋生輸給跟周博賢有連繫的李俊亮,對於被秋生在社交網揞名狂寸,周博賢昨在電話反擊秋生:「其實我哋成本小冊子,梁振英出現次數可能只係一次,唔係好多,可能佢status提梁振英次數,比我哋成本小冊子提嘅次數更多。」昨日獲423票的周博賢更潤爆獲216票包尾的秋生:「我都欣賞佢出嚟參選呢個行動,最後以低票落敗向佢致以安慰。」
周博賢重申其15人組成的「文化同行」政綱:「我諗佢都係針對一般泛民,即係ABC(Anyone but CY)策略陣營,我哋唔係ABC,我哋係BC,而反對梁振英連任只係我哋嘅政綱其中一個啫,我哋嘅政治立場係反對人大831、反對立法會功能界別嘅制度同爭取真普選。」

相關新聞:秋生信邪唔揀葉劉

製造反梁偽命題

昨日電話訪問中,秋生反駁周博賢:「佢哋(文化同行)唔喺小冊子提嘅,喺啲訪問,周博賢即係當咗自己代表晒14個,係代表人物。其實我唔係剩係講佢,我又冇指名道姓,我係講成件事,佢哋係一組人,你可以摷返之前佢哋係講ABC。」
忍到現在才爆seed的秋生,強調這是邏輯問題:「忍忍忍,點解忍到𠵱家至講呢啲,因為之前參選緊,費事攞啲嘢嚟話人。𠵱家冇官一身輕,覺得佢哋創造咗一個廉價符號『反對梁振英連任』,呢個係偽命題,因為梁振英冇話過出嚟選,即係我話反對米奇老鼠做特首一樣,係假㗎嘛!」

秋生直斥周博賢拿着「我是一個反抗者」的招牌,吸引人去支持,反而不做正事,秋生說:「即係代表文化界,我唔提文化政策,只要我提反梁振英,就係一個hero,大家唔使做其他嘢啦。」更狂插周博賢恭喜自己低票落敗虛偽:「我梗係低票落敗,唔係你以為我會高票當選,呢啲咪懶係禮貌嘅虛偽嘢,大家聽字面都聽到啦。」
至於跟周博賢雙雙落選,秋生說:「弓唔好張得太滿,說話唔好說得太死,之前啲囂張跋扈,聽聞有人話攞晒15席,嗰啲咁嘅說話邊度講得㗎。」
採訪:皓騫、何永寧

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載