› 選擇地區
三藩市
紐約
洛杉磯
其他美國地區
香港 台灣 北美
 
2016年12月13日

蘇永康唔收口
三個月兩次炒大鑊

正所謂「一樣米養百樣人」,又點會個個都同一種諗法呢?兩個人撞埋一齊,可以好合拍,亦都有機會好有火,鬧交有時想避都冇得避,最怕嘅係,唔收口繼續鬧,即係好似下面呢幾位咁囉:

Selina前夫張承中 VS 網民:
張承中今年3月同任家萱(Selina)離婚後,試過喺fb指Selina係「傷癒勇敢的神主牌 」,又叫人唔好稱呼佢做「XX前夫」,再以一篇長文指Selina人前活潑,實則朋友唔多。

言論咁惹火,梗係同有人為Selina抱不平,鬧佢借前妻炒作新聞,又暗寸佢諸多不滿,應該同記者講,而唔係facebook亂咁鬧人。

陳法蓉 VS 梁小冰:
上個月25號,慧妍雅集一班靚港姐出席開幕禮,但因為制服唔統一,梁小冰自揭俾陳法蓉當面斥責。兩人冇傾偈不特止,陳法蓉即場拉咗王愛倫做證人,當晚陳法蓉、梁小冰各自喺微博留言「解釋」事件。

呢把火一燒蔓延得好快,洪欣、朱茵等就撐陳法蓉,袁詠儀就支持番梁小冰。呢次亂局,由梁小冰宣佈退會結束,當時佢仲話一定唔會再同陳法蓉同場,如果有萬一,佢仲話驚會好似見到曱甴咁走開。

蘇永康(阿公) VS 鄭紹康:
陳子聰早前入院期間,流出咗一張同徐濠縈嘅合照,同陳子聰好好朋友嘅阿公,暗示「天下第一關」鄭紹康偷相,又同時鄭紹康以超低價$3,000邀請出騷。而鄭紹康就發聲明,話清者自清,阿徐都好信佢。

事件擾攘咗一個星期,兩人有來有往,阿公寸嘴金句極多,好似「原來佢仲重視我㗎」、「佢擘大眼講大話」咁,最爆一句係回應鄭紹康咨詢法律意見,阿公話:「佢話咨詢法律意見吖嘛,我律師真係等緊佢嘅。」

蘇永康 VS 網民:
又係阿公,上個底佢宣佈太太馮翠珊陀B之後,講咗佢對BB嘅期望,因為一句:「我唔想生一個梁天恆( 梁頌恆),唔想生一個游蕙禎,我要佢識分莊閒。」辣着火頭。當時梁頌恆就撰文暗寸蘇永康吸毒。

好多網民就支持梁頌恆,喺阿公facebook留言斥責佢唔尊重人,當然都有提過阿公吸毒件事,而阿公就對每一個反對留言都落重手,極速刪走。

相關新聞:魔術師多是非甄澤權欠學生貸款

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載