› 選擇地區
三藩市
紐約
洛杉磯
其他美國地區
香港 台灣 北美
 
2016年12月17日

《俠盜一號:星球大戰外傳》有乜必睇位?

《俠盜一號:星球大戰外傳》(Rogue One:A Star Wars Story)故事設定於1977年首部《星球大戰》發生之前,由英國女星菲莉絲迪鍾斯(Felicity Jones)飾演嘅女英雄珍艾素領軍救銀河,全片逾兩小時包含唔少精彩場面,《蘋果》集合以下幾個必睇位,不過小心內含劇透!

丹爺打白兵
《俠盜一號》破天荒起用華人演員參演重要角色,甄子丹飾演嘅雙目失明高僧智刃嚴,佢一出場已夠晒搶鏡,多場戲中又不停唸:「I am one with the force, the force is with me(我與原力合一、原力與我同在)」,尤其喺絕城一個打十個一幕就夠晒擔戲。

對白夠共鳴
菲莉絲迪鍾斯(Felicity Jones)擔任身手不凡嘅女主角珍艾素,由佢肩負起奪取死星藍圖拯救銀河使命。珍艾素同戴高路拿(Diego Luna)飾演革命軍隊長卡撒安多上校最初互相猜疑,當卡撒發現珍持有激光槍,珍回答一句:「信任係雙向嘅!」簡單得來又令觀眾共鳴,隨時成為經典對白。

父女終重逢
珍艾素一直追尋父親紀倫(麥斯米基辛飾)下落,由於紀倫以無間道身份繼續效力帝國軍,當珍終於搵到父親時,可惜遭開槍擊斃,珍與臨死嘅紀倫一幕父女重逢都以親情打動觀眾。

犧牲有價值
K-2SO取代R2D2、C3PO成為今集機械人嘅重要角色,由於直腸直肚,唔少場面都以精警對白贏得觀眾笑聲。不過最令觀眾深刻一幕,就係K-2SO為助女主角珍艾素及革命軍隊長卡撒安多上校取得死星藍圖,於危急關頭捨身擋帝國軍。

摯友齊慘死
六位主角最後都壯烈犧牲,而姜文扮演嘅霸煞馬斯,跟甄子丹飾演嘅智刃嚴係多年摯友,霸煞馬斯對智刃嚴嘅忠誠亦感動觀眾,二人先後為救銀河捐軀慘死場面,都令觀眾睇得心酸。

最後有驚喜
唔止有黑武士、R2D2、C3PO回歸,片中利用電腦特技重現經典場面,當中由嘉莉菲絲(Carrie Fisher)扮演嘅莉亞公主,到最尾一幕果然以年輕時嘅片段再現大銀幕,滿足廣大粉絲。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載