› 選擇地區
三藩市
紐約
洛杉磯
其他美國地區
香港 台灣 北美
 
2016年12月17日

絕望地黑仔? 馬明入完冷宮 出返變炮灰

有種炮灰,叫馬國明。

馬國明貴為大台小生,有樣又有觀眾緣,但係唔知點解大部份佢拍嘅劇都變為「炮灰」,原因咪就係因為佢黑仔囉。

首先,何謂「炮灰」?唔係代表套劇唔收得,而係講緊播出時間撞正大型體育賽事,或者撞正長假期,又或者唔好彩喺頒獎禮之後先播;頒獎禮過後,就算套劇幾收得,都要捱多一年先有得俾觀眾投票,到時觀眾都可能唔記得咗啦,又有可能被其他勢頭更強嘅劇集蓋過。

好喇,講番馬國明呢筆,其實o依家播出嘅劇集《流氓皇帝》早於兩年前已經拍好,但因為當時馬明扭計,同大台未傾好續約嘅事,導致《流》劇被抽起。本身大台高層講明會力捧馬明,不過因為未傾掂續約,所以第一次被抽起;後來,到高層點頭say Yes,仲安排拍劇集宣傳片。點知臨門一腳撻Q,大台轉捧王浩信,將該檔期改播Signal Wong處男擔正嘅《樓奴》。有指係因為高層都係覺得馬明「唔乖」,所以連宣傳片拍攝都取消埋。

到o依家馬明乖乖同大台續約,之前被hold起放入倉底嘅劇集,終於可以重見天日,不過都係淪為「炮灰」。皆因本月18號(星期日)就係頒獎禮喇,得番3日時間,又邊谷得起喎。

劇集可以重見天日,本身係一件開心事,不過網民對《流》劇好多負皮,戥馬明唔抵,網民覺得:「都係舊版好睇啲」,「要馬明做小醜」,「我都留意到馬明做親都係戇X仔,俾啲好角色佢啦」,「馬明呆」。

雖然今次《流》劇做咗炮灰,不過馬明都唔使灰心嘅,喺雪櫃行番出嚟又係一條好漢啦!啱唔啱先?有曝光總好過冇曝光嘛,加上《流》劇播完後,馬明會有新劇《降魔的》接住播,觀眾又可以Keep住見佢個靚仔樣喇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載