› 選擇地區
三藩市
紐約
洛杉磯
其他美國地區
香港 台灣 北美
 
2016年12月18日

【名門】呂志和孫女隱藏身份打工
呂嘉瑩捱鬧中成長

百億富豪、銀河娛樂集團主席呂志和家族一向低調,子女、孫兒不少從未曝光。呂志和長子、呂耀東的大女呂嘉瑩(Joanna)前日罕有在澳門受訪,介紹自己首次主理的咖啡館Cha Bei(茶杯)。呂嘉瑩提到家訓:「爺爺成日講,做人要勤奮,失敗三次都要試,總會有一次成功!」祖父輩捱得,她接棒前,都先企過酒店接待處,做錯事一樣捱鬧。
採訪:林妙萍
攝影:周樂恆

呂家第三代大孫女呂嘉瑩30歲出頭,着住綠色皮褸在仍未拆裝修圍板的「Cha Bei」咖啡館四處打點,「由今年3月開始籌劃,下個月終於開幕。」緊張皆因是自己為銀河擔大旗的首個project。

相關新聞:Cha Bei摩登自然風

家宴飯後必飲普洱

Joanna讀心理學,小時候夢想做教師,讀完書發現喜歡酒店業,近年返銀河學接棒,就以鍾意的餐飲業起步,「呢兩年好幸運去咗好多地方,返到澳門,發現澳門只有兩大類餐廳,一係好fine dining,一係好地道,所以想做一間casual dining,中西合璧的cafe。」
愛茶、開茶館的概念,也來自爺爺呂志和。原來呂家飯後,必泡一壺普洱茶,「嫲嫲好鍾意搵啲新奇古怪的茶畀我哋試,試過將普洱磨咗漿再做成丸子嘅普洱波波,放入熱水就會溶,冇咗茶葉。」飲茶時間,一家人圍在一起,傾日常家事,「爺爺好慈祥,教我哋好多人生道理。細細個已成日聽佢教,做人要勤奮,第一次做唔到,要做第二次,第三次失敗都要再做,總有一次會成功的。」

求職君悅由低做起

爸爸呂耀東曾自爆當年在石礦場磨練,呂嘉瑩同樣要先出去歷練。自己寫求職信去君悅酒店,做了四年,由前台接待到餐飲婚宴,做錯事一樣被鬧。「頭一兩年真係冇人知,因為我真係自己去求職,有少少特登唔去透露自己身份,因為想學、同睇啲嘢,係真係會唔同。多謝老細畀好多機會我,成日鬧我,教我睇嘢要好仔細。」千金小姐頂得住被鬧?「我唔係一個好容易喊嘅人。我唔覺得辛苦,好記得嗰時啲team work,共度難關,對我𠵱家處事影響好大。」
對被標籤為富三代有沒有壓力?「做每個人嘅仔女都會有壓力,好似爹哋話齋,做個好人,你係邊個嘅後代都冇問題。」

已經封盤下年結婚

呂嘉瑩爽朗隨和,訪問期間經常笑,熱愛旅行、行山大自然,行勻麥理浩徑第二段、大潭水塘等地,新店裝潢來自阿姆斯特丹、哥本哈根、倫敦的旅遊靈感。「我鍾意大自然,所以有好多綠色,粉紅色就係所有女仔都鍾意,木就係帶出大自然嘅感覺。」
談咖啡館及興趣就任問,但提到男友她就封口,「我可唔可以唔講?或者下次先講?」擇偶條件最重要人品個性,「品格最緊要,人要好啦,要愛錫家人及誠實,做番自己本份。」據知,原來太子女已經訂婚封盤,下年結婚。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載