蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月18日

28年前分手 各自離婚後翻撻
舞王麥德羅 娶Big Echo老闆娘

98,349

Big Echo老闆娘劉麗萍(Apple姐)今年東山再起重開卡拉OK,更宣佈與28年前分手的香港一代舞王麥德羅拉埋天窗!麥德羅與Apple姐同樣經歷過失敗的婚姻,如今再婚,Apple姐昨表示:「始終大家都年紀大,有乜嘢都可以互相照顧。」

相關新聞:【自小習武】勁舞揚威英國

現年58歲的香港舞王麥德羅,經歷過婚姻失敗,與前妻育有一子的他,32年前曾與劉麗萍拍拖4年,分手後兩人各走各路。Apple姐之後將日本Big Echo引入香港,被喻為一代K后。54歲的Apple姐亦經歷兩段失敗婚姻,育有兩女一子,她曾於高峯期擁18間卡拉OK,更一手發掘容祖兒,亦因為03年沙士一鋪清袋而破產,近日她東山再起於旺角重開Big Echo i-box,事業得意同時感情亦有着落,宣佈後年與麥德羅拉埋天窗。

三喜臨門

昨日有周刊報道,Apple姐在22歲時曾跟麥德羅拍拖,當時認為對方花弗多女埋身及工作忙碌,最終跟麥德羅分手,並各自組織家庭。直至05年,Apple姐擔任企業顧問推出一款水機,邀請肥媽擔任代言人,肥媽在宣傳活動邀請了麥德羅做嘉賓,這對舊情人才再次重遇,Apple姐與同樣已離婚的麥德羅接觸多次後,重拾當年拍拖感覺,二人並於07年復合。訪問中,Apple姐表示從沒再婚打算,反正大家結過婚及離過婚,一紙婚書不再重要,但直到自己一次入院,麥德羅全心照顧,最終打動了Apple姐,兩人決定在後年、麥德羅60歲大壽兼入行40年舉行婚禮,實行三喜臨門。

相關新聞:【沙士破產】K后發掘祖兒

多次求婚

麥德羅現為Apple姐娛樂公司旗下藝人,二人正於馬來西亞做騷,Apple姐昨接受本報電話訪問時多謝大家祝福和關心,並說:「其實我同Robert(麥德羅)都一齊好耐,佢平時成個大細路,成日激嬲我都會買隻戒指畀我,借啲意求婚,不過次次我都當佢講笑,仲鬧佢唔正經,叫佢乖啲先講喇。」問到麥德羅最終打動她是甚麼原因?Apple姐說:「一個月前我胃痛入急症室,其中一欄要填緊急聯絡人,嗰一刻諗好似冇喎,啲仔女又唔喺身邊,嗰陣又嬲佢哋,所以咪答冇喎。但靜咗落嚟諗,如果真係有乜嘢事,好似冇親人幫手安排,當然我冇同佢(麥德羅)講過,點知佢突然有呢個安排。」
至於婚禮細節,Apple姐說:「仲未有時間去諗,到時真係有個儀式,始終大家都年紀大,有乜嘢都可以互相照顧同安排。」麥德羅昨在電話則說:「會同60歲生日一齊搞,希望可以畀個求婚驚喜,唔講咁多住!」
採訪:何慧斯

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載