› 選擇地區
三藩市
紐約
洛杉磯
其他美國地區
香港 台灣 北美
 
2016年12月23日

不分忠奸教育子女
鄭中基容許囡囡爆粗

「暴龍哥」鄭中基同有線前主播余思敏之間育有一女一子,分別係已經5歲嘅Emma同下年2月就兩歲嘅Evan。據知,鄭中將培育子女嘅重任交畀太太余思敏負責,喺12年,鄭中基接受傳媒訪問時曾透露,自己希望囡囡可以喺3歲先返學,但礙於社會競爭大,所以幫囡囡報讀學前班,而佢同余思敏幫囡囡揀嘅幼稚園,主要係透過遊戲來畀小朋友學習語言、認知同社交能力,加上學校有外籍老師駐校,並以兩文三語教授,所以啲學生畢業後多數都可以入讀國際學校。

而鄭中基同余思敏對教育子女嗰一套亦有同樣睇法,鄭中基曾表示佢哋兩公婆唔會分飾忠奸角教育小孩:「囡囡如果同我玩,咁啱曳曳,我會同佢講唔可以咁做,否則媽咪會嬲;相反囡囡同媽咪玩,遇到相同情況,我就要出場,呢招囡囡好肯聽。」

喺教育子女方面,鄭中基亦有啲另類,佢包容到囡囡講粗口,事源有一次Emma喺佢講電話時學咗一句粗口,之後某日突然間記得而爆粗,搞到全車人望住爸爸鄭中基,但鄭中基冇嬲不特止,仲覺得囡囡冇講錯:「佢講得啱喎,佢冇用錯呀,我冇教過,其實佢大咗都會識,問題係喺父母面前講唔講,就算講都唔係乜嘢大件事。」鄭中基又話:「如果真係見到媽媽對小朋友講,我就會話:『呢個auntie曳曳嘞,唔應該講啲咁嘅嘢嘅……係都大個啲先啦!』」嚟教番囡囡乜嘢先係正確。

為咗一對子女,鄭中基唔單只小心講嘢,戒粗口之餘,更開始戒煙,佢今年9月喺澳門舉行演唱會時透露過:「「有小朋友之後係食少咗煙,因為我去到邊度食,個女都會飆到出嚟問:『乜咁臭呀?』唉!得嘞得嘞,然後整熄支煙。就算我喺屋企樓下車房,佢都會衝落嚟問:『乜咁臭呀?』我就會唔食。」連余思敏都要靠老公個「前世情人」嚟治佢。

其實除咗呢啲實際行動,婚前係浪子嘅鄭中基,喺結婚生女後,變成一個顧家男人,佢會要求開早更,希望趕得切夜晚7點半返屋企同仔女食飯,把握兩個鐘嘅黃金相處時間,或者寧願9點半後再出門口做嘢。

相關新聞:fb寸盡何君堯楊偉雄網民like到爆鄭中基

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載