› 選擇地區
三藩市
紐約
洛杉磯
其他美國地區
香港 台灣 北美
 
2016年12月29日

【動大事2016】娛圈之最
大劉夠霸氣 G.E.M.衣着嚇人

又到年尾,係時候同大家回顧呢年發生過嘅事。能夠登上娛樂版「年度之最」寶座,絕非等閒之輩,恭喜晒所有得獎名人!

年度之「最佳衣着」
巨G.E.M.來回宇宙又折返人間,忽發奇想玩cosplay,扮哪叱同《蟲蟲特工隊》,不過都唔夠佢個尿布褲造型恐怖,兒夜姨野...嚇死人呀!

年度之「最敢言」
「是有種人,純粹熱愛耕耘,有種個性,從未曾被發掘」呢首係阿詩今年嘅新歌《是有種人》,做咗獨立歌手,冇合約束縛,繼續做最敢言女歌手。
年中,Lancome搵佢開音樂會,點知激嬲大陸網友同媒體。最後Lancome決定跪低,出聲明澄清阿詩唔係代言人,激嬲香港人。事後阿詩宣佈,喺本來舉行音樂會嘅同一日,即係6月19號,同地點搞場騷,吸引幾百人撐場。今年11月21號,阿詩仲入選BBC全球百大女性,方丈今勻仲唔嬲到震?!

年度之「最瘀」
Rest in piece? One Peace? 唉,「連piece雅」今次真係瘀到爆囉。
2013年,連詩雅悼念保羅獲加,喺IG打咗句「Rest in piece」,被人笑到依家。點知今年7月仲未識驚,去完海賊王個嘉年華活動,又喺IG將「One Piece」串錯做「One Peace」。事後,網絡紅人瓊姐抽佢水,抽到連詩雅喺facebook開live,直播自抄1000次呀。

年度之「戀情進展最快」
高調示愛,又高調嗌分手,以為吳若希同澳門闊少呢段戀情,就咁完啦。點知轉個頭,吳若希又喺IG宣佈暫別樂壇,搞到外間傳佢未婚懷孕。嗱,佢冇否認架,仲話有咗3個月話畀大家知。去到11月,終於有喜訊啦!吳若希宣佈陀B女,仲話同Alex分咗手先知有咗噃。不過男友都有負責任,諗住等吳若希生完B,之後再補辦婚禮。吳若希陀B期間,準爸爸同準媽媽仲不斷喺IG放閃,燦死人呀。

年度之「最親民」
講到親民,一定係發哥。講到發哥,就梗係諗起selfie啦。今年5月,發哥出席電影宣傳活動,嚟個3分鐘,同超過110人逐一selfie,挑戰世界紀錄呀。

年度之「最高容忍度」
呢個世代嘅人妻,原來EQ好高架。
中國羽壇一哥林丹,偷食內地女星趙雅淇,老婆謝杏芳原諒佢;練海棠偷嗒34D長髮女,老婆伍姑娘出面say sorry;新女婿Dicky疑似同舊愛流出床照,老婆同外母陳曼娜都絕對信任佢;陳昭昭男友疑似同舊愛藕斷絲連,陳昭昭都視男友係結婚對象。
一句講晒,人妻唔易做!

年度之「最霸氣」
正所謂講野要牙力,做男人最緊要有財力。大劉之所以登上「年度最霸氣」之位,梗係花咗唔少「財」啦。
今年11月15號,大劉(劉鑾雄)喺多份報章登頭版,同舊愛呂麗君劃清界線。11月16號,大劉同甘比喺香港入紙登記註冊,甘比正式成為劉太。大劉婚後首次露面,着住睡衣,同老婆坐車落地盤,再一次展示男人霸氣呀。

相關新聞:【2016回顧】吳若希待產

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載