› 選擇地區
三藩市
紐約
洛杉磯
其他美國地區
香港 台灣 北美
 
2016年12月30日

一家三口糖黐豆勁溫馨
張頴康父愛滿瀉嘉年華

「三寶」張頴康入咗行16年,今年憑住《一屋老友記》終於上位,連續喺大馬同月初嘅大台頒獎禮拎咗「飛躍進步男藝員」,喺台上除咗多謝太太支持,仲話要多謝劉德華鼓勵入行參加訓練班。

趁住呢幾日凍咗,多咗冬日氣氛,張頴康前晚一家三口就去咗中環嘅友邦嘉年華,捉住聖誕嘅尾巴。

張頴康同太太麥雅緻拖住兩歲幾嘅囡囡,三人齊齊着晒羽絨包到實咁現身嘉年華,期間就遇到李志剛等嘅港台DJ朋友,企喺度吹咗一陣水,之後8個人仲一齊玩攤位遊戲。

廿四孝嘅張頴康陪住囡囡玩兒童機動遊戲,無論係迷你火車定小型划艇,都望到囡囡實一實,眼入面好似得番阿女咁。而每逢喺攤位遊戲贏到啲獎品,第一時間就遞俾囡囡,o氹到囡囡勁開心,拎住啲公仔周圍走。

咁有父愛嘅爸爸,囡囡就梗係興奮啦,全程嗲實又要拖又要抱,而張頴康亦就晒乖女,唔係拖住囡囡就係抱起佢行,完全話到俾人聽咩叫做父愛!張頴康亦都把握機會,不時拎部相機出嚟影下囡囡。有途人見到張頴康都上前集郵,而張頴康都逐一答應,冇托手踭。

相關新聞:余思敏陪子女去嘉年華

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載