› 選擇地區
三藩市
紐約
洛杉磯
其他美國地區
香港 台灣 北美
 
2017年01月01日

梁振英夫婦睇學友騷
唱完即閃驚啲咩?

歌神張學友呢排喺紅館舉行演唱會,鍾楚紅、葉德嫻、吳婉芳、劉嘉玲、陳奕迅、楊千嬅同老公丁子高、張家輝同關詠荷夫婦、任達華、胡楓、何超蓮、何超雲、容祖兒、蔡卓妍、劉美君、吳業坤、周麗淇……排隊朝聖嘅藝人,幾隻手都數唔晒!然而,大前晚觀眾席上卻出現咗一對夫婦,搞到網友㷫爆群起改歌詞唱。

事緣音樂人梁栢堅喺facebook貼咗特首梁振英夫婦現身紅館、兩人坐喺控制台下面嘅VIP位睇騷,梁栢堅仲藉住學友嘅歌曲諧音寸爆689兩公婆:「噚晚張學友:還是覺得你老母、每天插你多一些、愛摸蝦...餓狼傳說!」佢班網友亦熱烈留言:「時運低呀你。」、「我都睇咗噚晚嗰場,唱完佢即閃人。」、「搞乜咁慘時運低撞到污糟嘢!」

無論係梁栢堅定佢啲追隨者,一向都有個習慣,就係每次出事都鍾意改歌詞,今次又點會例外先?睇相都㷫爆嘅網友,紛紛加入改歌詞行列發洩:「怎麼你新聞表現X了,髮型又亂了,彷彿見曉明被換了,一覺知、心裡知不妙,這晚你去過那裡吧,與上海幫靜靜談著舊調。」、「狼在叫,獸與妖,面似坦率心在笑,雙手搶,尾巴搖,競向中央比折腰。」、「餓狼傳說,直頭唔使改詞。」

梁栢堅前日接受《蘋果》電話訪問,佢話呢張相係朋友影嘅:「2016年走咗咁多人,咁見到嘅人都要珍惜吓,可能呢,唔知幾時會唔見啦,呢啲嘢,下話!」梁栢堅仲忍唔住出手改歌詞潤爆689:「即使你離開,有葉劉下海,這漫長夜裏,林鄭仲有鬼胎......」

相關新聞:麥明詩約梁頌昕溜冰仆到瞓地

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載