› 選擇地區
三藩市
紐約
洛杉磯
其他美國地區
香港 台灣 北美
 
2017年01月08日

險遭阿姐毀容 黃淑儀離婚
鼎爺:冇地方可搬過嚟

當年入讀麗的訓練班晉身娛樂圈的黃淑儀,1968年以女主角身份跟馮淬帆演出全港首部長篇電視劇《夢斷情天》,其後演出多部經典作品,包括《倚天屠龍記》、《書劍恩仇錄》及《紅顏》等等,與汪明荃、李司棋、趙雅芝曾被喻為無綫四大花旦。

自認戀愛大過天的黃淑儀,19歲嫁俾大過佢廿幾年嘅無綫高層劉芳剛,生下一對子女,惜婚姻只維持了7年。80年她遇上讀醫的徐景清,翌年結婚,之後退出娛樂圈,85年舉家移民加拿大,至00年先至返港客串幕前。

有關於昔日大台呢四大花旦,不和傳聞傳到今時今日仍然為人津津樂道,好似話傳黃淑儀同司棋姐冇偈傾、阿姐汪明荃同趙雅芝又爭餐死咁樣樣,花生一地都係。但原來黃淑儀同阿姐都傳過唔妥,件事又去番黃淑儀同李家鼎結緣嘅劇集《書劍恩仇錄》度喇。

有指當年黃淑儀同阿姐曾爭做《書劍恩仇錄》女主角霍青桐,最後阿姐爭贏。及後拍攝期間,有一場兩人比劍的戲,阿姐劍指黃淑儀額頭,唔小心整傷佢,啲血涔涔而下,仲爭啲毀容,兩人自此傳不和。當日送黃淑儀入院嘅,就係身兼演員同武術指導兩職嘅鼎爺。

昨日有周刊刊登黃淑儀嘅最新訪問,除澄清番李家鼎唔係佢烹飪師傅之外,又同大家分享佢同鼎爺嘅緣份——包括嗰次受傷。黃淑儀話佢嗰陣俾阿姐把劍刺傷,鼎爺一把抱起佢,由錄影廠一直跑跑跑跑出去廣播道總台門口上車。

鼎爺係硬錚錚真漢子,心口掛住個義字,兩脇插刀。當年黃淑儀拍完《書劍》後同劉芳剛離婚,嗰陣鼎爺二話不說,就同黃淑儀講,問佢有冇地方住,如果冇,可以搬去佢度。當時鼎爺已經同施明結咗婚。

正常男人都唔會咁樣伸出援手——老婆唔殺咗佢先偷笑啦,但鼎爺真係義字行頭,其他婆媽嘢反而冇諗;今時今日黃淑儀提番此事,仍然感激當日恩情,雖然佢最後都冇寄居鼎爺屋企。

鼎爺就話,當年施明都好支持佢幫助黃淑儀,正所謂朋友落難,自是義不容辭。果然人間有情。

相關新聞:黃淑儀冇向鼎爺學廚

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載