› 選擇地區
三藩市
紐約
洛杉磯
其他美國地區
香港 台灣 北美
 
2017年01月09日

【馮仁昭四圍超】
甄子丹輸馬:跟加讚學嘢

甄子丹同蔡加讚合資嘅愛駒出賽,並帶同老婆及外父去撐場。

大哥洪金寶同甄子丹兩個打得之人噚日有馬匹出賽,參加喺沙田馬場舉行嘅洋紫荊短途錦標賽,大哥嘅「崇山寶」大戰子丹同蔡加讚合資嘅「宇宙車神」,子丹更帶埋老婆入場打氣,不過佢哋兩隻愛駒都係三甲不入,「崇山寶」就跑梗頸四,大哥受訪時話輸馬冇失望。問子丹喺場內有冇同大哥傾馬經,佢就笑言:「有同佢講生日快樂,佢好似係噚日生日。」提到大家齊齊贏唔到盃賽,子丹表示:「佢贏咗咁多,我哋都拉過三次頭馬,我唔識,跟加讚嚟學嘢。」加讚就補充:「贏馬好開心,會開心到跳起。」
另外,張秀文出席馬場活動時,被問到同屆港姐莊思明被指日前深夜同男友楊明去跑馬地求醫,懷疑有孕,佢就話:「有就恭喜佢,佢哋兩個好sweet,睇好佢哋,我都係圈中人,唔可以畀壓力,係真嘅佢會請我飲嘅,自己對小朋友冇渴望,所以唔會未婚懷孕。」

莊思明一定會生

當事人莊思明回覆傳媒否認有B:「其實嗰排唔舒服咗幾日啦,嗰晚放咗工,咪去醫院睇醫生囉!其實我同楊明都鍾意小朋友,亦都計劃結婚後一定生B,但𠵱家冇囉,如果真係有咗,就會肥啦!」而楊明在大球場的活動上否認女友懷孕,自言做足安全措施,指女友當天因傷風不適入院。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載