› 選擇地區
三藩市
紐約
洛杉磯
其他美國地區
香港 台灣 北美
 
2017年01月11日

【馮仁昭四圍超】
鄧兆尊否認有四奶:三個已夠煩

鄧兆尊真係好重桃花運,除咗有大婆Carmen、二奶車厘子(Cherry),同祥嫂洪金梅踢爆有揼骨妹三奶(Claire)外,噚日又有周刊爆佢有四奶。報道話佢日前帶車厘子、Claire同疑似新歡高䠷美女到時代廣場行街,呢位美女操半鹹淡廣東話,身材玲瓏浮凸。
報道話三女一齊圍埋睇香水,Claire見兆尊好似有少少悶,即攞其中一種味道畀佢聞吓。三女揀完香水,兆尊二話不說就去畀錢,跟住去咗附近一間韓國料理食晚飯,全部坐埋一枱,真係服咗兆尊。

「係茶餐廳老闆娘」

馮仁昭噚日打電話畀兆尊,佢堅決否認有四奶:「唔係呀,呢個女子係茶餐廳老闆娘,熟咪一齊食飯囉。」點解送香水?佢話:「同朋友食飯唔可以送嘢咩!唔好見我同女性朋友一齊,都話係我女朋友,我𠵱家只得三個女朋友,已經夠煩㗎喇,冇諗住再有第四個。」
兆尊又話揼骨妹英文名叫Claire,佢好維護女友咁話:「其實都尊重吓人,佢叫Claire。」三個女朋友都係C字頭,乜咁啱嘅?兆尊笑笑口話:「我本命忌C,Claire自己改呢個英文名,佢意思係I don't care(Claire)喎。」有冇諗過結婚生BB呢?兆尊好認真咁話:「唔好玩啦,我𠵱家咁嘅局面,點結婚生仔呀!」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載