蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月11日

方東昇又嚟
《世界零距離III》再爆金句

39,705

無綫新聞主播方東昇,自從上一輯《世界零距離II》,被發掘到佢風趣搞笑一面,係咁喺節目大搞爛gag金句,好似「抱得美人龜」、「歲月不饒人,起身見頭暈」等等。

方東昇嘅神隱笑點,前晚又再喺大台爆發,佢同記者黃曉瑩、陳沛珈主持嘅《世界零距離III》將由星期一至五晚,晚上十點半播放。

查實呢輯節目,去年已於互動新聞台及TVB新聞台播出,依家翡翠台呢個係足本播放。唔知呢輯《世界零距離》,能唔能夠緊接鼎爺主持《阿爺廚房》嘅餘威,收視報捷呢!

講番「昇爺」方東昇先,今輯《世界零距離III》佢哋先去到非洲埃塞俄比亞,探討當地0依家嘅生活。現時埃塞俄比亞經濟發展已經得到改善,人民生活質素亦有提高,節目中,昇爺同陳沛珈、黃曉瑩仲為觀眾展示當地另一面,包括試食著名嘅「英吉拉餅」,當地人一日三餐都會食佢,但以往有人話「英吉拉餅」嘅味道就好似「臭襪」味,咁昇爺試食後,佢就拋下一句金句 :「一試無妨,再試投降」。

節目內,昇爺除咗拜訪咗埃塞俄比亞總統穆拉圖外,佢仲拜訪咗「長跑皇帝」基比斯拉斯,佢哋仲上咗高山嘅森林跑步,昇爺就跑到上氣唔接下氣,金句又再次出現喇:「上氣不接下氣,高手教你理順條氣」。跑完山,佢同基比斯拉斯再去做Gym,喺跑步機上,見到昇爺就話:「路遙知馬力,啲汗係咁滴」。

最後昇爺再講到埃塞俄比亞原來盛產玫瑰,佢就話當地人知道「原來花開,真係可以富貴」。

半個鐘嘅節目,昇爺都有唔少金句,唔知今集佢又派幾句金句呢!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載