蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月18日

【《蘋果》專訪】歷喪孫之痛 走投無路領綜援
車保羅感謝老婆:陪我走過最慘日子

107,244

近年屢傳死訊的車保羅,其實打不死。03年沙士爆發,同年車保羅經歷被無綫炒魷、外孫女車禍慘死、失業要攞綜援,要幾黑有幾黑。幸堅強意志令他走過低谷,縱使今日只在博愛醫院當雜工,但他坦言:「有固定收入,𠵱家好滿足。」更感激不離不棄的菲籍太太Inday:「佢陪我走過最慘嘅日子。」

相關新聞:瘦虎肥龍重逢讚星爺好Nice

憑六呎三高人一等身材晉身娛樂圈的57歲車保羅(原名吳溟蒼),由當年在電視劇《IQ成熟時》演學生哥到電影《踏血尋梅》老父角色,做過明星又做過保安和地盤雜工,最霉日子要靠攞綜援過活,甚至連母親病逝也要四處籌錢殮葬。十年前,車保羅到博愛醫院董事局做雜工,由月入幾千做到今日五位數,生活未算富裕但知足,日前他接受本報記者專訪時笑說:「如果你唔enjoy,絕對係好辛苦,但如果enjoy,絕對冇問題。」

「有羞恥感覺」

03年沙士爆發,同年車保羅被無綫炒魷,他說:「嗰時有班老人家,強積金佢哋(無綫)唔想再同你供,啱啱你個期一完咗,佢哋話:『咁啦,我哋唔係唔想同你續約,我哋用另一個方式同你續,就二千蚊一年啦。』我話不如算數,我行返出去,總之我口煙我罐啤酒仲顧得掂嘅話,不求人啦。」

相關新聞:【歷高低潮】憑阿怪成名入行

惜車保羅被無綫炒魷後,找不到工作,生活陷入困境,要靠綜援過活,他說:「攞咗幾個月,有種羞恥嘅感覺,後來朋友知道,叫我唔好再攞跟佢做樓宇維修。為兩餐好多工種我都做過,譬如保安、地盤雜工、跟人尾遞架生、搬石屎,香港地你肯做就得。」屋漏兼逢夜雨,車保羅被無綫炒魷沒多久,他的5歲外孫女李津兒慘被車撞斃,他形容是人生最黑暗日子:「真係好潦倒、好黑,無綫唔要你,出去搵唔到嘢做,突然間又整單意外,百感交集。後期都係靠自己意志同樂天派思想撐番起,唔會自怨自艾,到今時今日我覺得自己好僥倖,我可以做番人。」

月底榮升爺爺

令車保羅繼續撐下去的,還有過去二十五年不離不棄的現任菲籍太太Inday。原來55歲Inday曾是車保羅家中女傭,跟首任太太一樣都是奉子成婚,他笑說:「點解我帶女人返去,佢好似有少少呷醋嘅?有一晚風雨交加之夜,就搞掂咗啦,咁我哋就共諧連理,佢陪我走過最慘嘅日子。」車保羅跟前妻所生女兒早年再生下一子一女,至於他與現任太太所生的25歲兒子吳卓偉,不但遺傳父親高頭大馬基因,身高達六呎七,而且跟父親一樣奉子成婚,於月前與菲籍女友Gerlie註冊結婚,車保羅預計本月底榮升爺爺,他笑說:「有其父必有其子吖嘛。」
車保羅偶爾會客串電影,但他斷言不會再以演員為終身職業:「我寧願要一份穩定嘅工作,每個禮拜做45小時,逢紅色放假,有乜唔好?我𠵱家好滿足,有固定收入,月入五個位,希望做到退休。」

採訪:戴彩煥、余傲芝
攝影:陳慧安

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載