› 選擇地區
三藩市
紐約
洛杉磯
其他美國地區
香港 台灣 北美
 
2017年01月20日

拍劇戲份被刪海報冇影
肥媽呻笨拒接大台賀年節目

62歲嘅肥媽(Maria Cordero),自從13年幫無綫主持飲食節目《搵食》後,每年都會幫大台拍攝《食平D》系列,節目大收旺場,仲帶挈埋契仔陸浩明入屋。去年佢仲幫大台拍埋劇集《味想天開》㖭!但昨日就有報道話肥媽覺得被大台搵笨,搞到肥媽好嬲豬要搵同朋友狂呻。

是咁的,肥媽幫大台拍攝《食平D》系列,令到佢同契仔都人氣急升,做埋收視保證嘅福將,咁肥媽話晒都係唱家班出身,大台去年就搵埋佢幫手唱《味想天開》嘅主題曲啦,但報道話只係叫佢唱主題曲好似好怪咁,所以就游說佢拍埋劇,咁肥媽就諗住捱吓義氣,應承咗大台喇!

點知做人有義氣,換來一肚氣,肥媽呢五年主持嘅《食平D》系列,但咁多年都冇攞過大台頒獎禮嘅「最佳節目主持」,今年輸俾鄭裕玲(Do姐)之餘,仲要三甲都唔入。呢啲都算,肥媽幫佢拍嘅劇集《味想天開》,要安排喺新年嘅炮灰檔播放,更令肥媽谷氣嘅,係佢喺劇入面嘅戲份大幅刪減,戲中飾演波斯公主嘅佢,仲要安排到中段先出場,搶鏡度又點及由頭帶到尾嘅配角李國麟同蔣志光吖!

肥媽除咗嬲戲份被刪之外,最令佢chok住條氣嘅就係連宣傳海報都冇佢份呀,真係so sad!報道入面有知情人士話,肥媽搵咗啲老友狂呻,仲爆粗話覺得俾大台搵笨X,要佢幫手佢就冇托手踭,利用完人就多謝都冇句!最後報道仲話,肥媽嬲到話明以後唔幫大台拍劇,仲推埋大台嘅賀年節目,喺農曆年出埠登台搵真銀㖭!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載