› 選擇地區
三藩市
紐約
洛杉磯
其他美國地區
香港 台灣 北美
 
2017年01月28日

劉華接福賀雞年

今日是雞年大年初一,先恭祝讀者雞年行大運,大雞大利、雞年旺相!本報在劉德華受傷前兩天,邀請他拍攝一輯賀年照及做專訪,他回憶童年時過年的點滴,竟於大年初一與長輩打架。另外,華仔好友鄭秀文、杜琪峯、劉偉強和陳小春等,為本報拍片誠心祝福華仔早日康復。
採訪:鍾國仁

相關新聞:群星集氣撐華仔

踏入雞年,劉德華雖然因墮馬受傷要在醫院過年,在意外發生前兩天,華仔接受本報專訪,不忘為香港市民祈求雞年事事順境、身體健康、萬事勝意。熟識華仔的都知他崇尚傳統,過年依足中國習俗,除年廿八洗邋遢、年三十晚團年外,每逢大年初一都要向雙親拜年和接財神。華仔說:「年初一差唔多夜晚要開始接財神,接完財神,大約6點就會去同爸爸媽媽斟茶,第一封利是一定畀爸爸媽媽,最大封都應該係!」可惜華仔早前在泰國墮馬受傷要留院,過年的傳統習俗今年恐怕未能完全做足。

同長輩「開年」

一般打工仔而言,新年終於可以「收爐」,但對於熱愛工作的華仔來說,以往大時大節卻是每年最忙碌的時段。華仔又認為童年時過的新年最難忘,還自爆曾與長輩打架,華仔說:「因為嗰時一年只有一套新衫,套新衫年初一要着。我記得有次同啲世叔伯打交,就係年初一。我有件金色嘅棉衲,好有型,當時大家喺度玩滴滴金,俾佢哋燒到,喺背脊燒花咗少少,咁就年初一打交,跟住俾阿媽打!」
農曆年假對華仔來說相當寶貴,盡可能都留給他的至親,因此近年已很少拜年,但偶爾會有親朋戚友到訪,便有緣品嚐華仔自製的蘿蔔糕。問假若要邀請一位圈中朋友過年,他會挑選誰?華仔笑說:「最唔得罪人就揀Deanie姐(葉德嫻)啦!」大家以為華仔新年期間深居簡出,但原來他也會行花市的,且甚懂花市行情:「其實我真係會行,成日都會喺花園街出現,太早買就會好貴,越近年三十就會越平!」

「想拍藝術片」

華仔曾說過要一嘗做導演滋味,不過現階段仍未有具體計劃,只討論過一些劇本,他說:「我諗過喜劇,因為喜劇起碼有個底,票房呀各樣嘢。但如果喜劇唔賣呢?又好似覺得我好渣。我又好想拍藝術片,咁唔賣呢都冇得講!其實越做得多,越覺得係咪真係夠料去做導演。」
此外,華仔主演及監製的電影《拆彈專家》已定於4月上映,戲中華仔不但是一名拆彈專家,更曾經是無間道一名,他跟內地藝人姜武有不少對手戲,經常穿上重厚拆彈服的華仔有一句金句︰「拆彈不是你想就能做,是要上天批准的。」
造型:Olivia Tsang
服裝:Blanc de Chine and Hogan
化妝及髮型:阿麗
場地提供:好酒好蔡

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載