› 選擇地區
三藩市
紐約
洛杉磯
其他美國地區
香港 台灣 北美
 
2017年02月01日

張繼聰謝安琪最叻放閃
結婚10年恩愛如昔

張繼聰同謝安琪(Kay)07年奉子成婚,一直恩愛至今,上年Kay胎B女,宣佈暫時休息,喺呢段時間入面,張繼聰多次被影到陪住Kay出街,對老婆照顧有加。

結婚咁多年以嚟,張繼聰一直係愛妻號,07年度嘅叱咤頒獎禮,深情咁喺台上話過「我同我自己講,我一定好好照顧我太太,照顧我個仔。」最經典嘅,就肯定係呢句:「就算時光倒流幾多次,我都會娶你做老婆。我愛你。」結果佢講得出做得到,成功將以往女尊男卑嘅印象扭轉。

而最man一次,係上年Kay開完演唱會,張繼聰喺Ig貼咗同老婆嘅合照,不過有人嫌Kay樣衰,結果張繼聰迅速回覆:「我覺得我太太是真‧漂亮!小姐,你覺得你在這裡留下這樣的文字,我看到會有什麼反應?」

再數近少少,上年11月張繼聰被影到親手幫Kay換走對鬆糕鞋,之後仲公開話:「如果條路個窿,我都瞓喺地下俾佢行過去!」

呢兩公婆除咗平時出街恩恩愛愛,都好鍾意耍花槍,上個月兩個人為咗《男兒當入樽》呢套漫畫嘅擁有權「鬧交」,呢個共同嗜好,甜蜜得嚟又溫馨。

直到今年1月20號,喺佢哋結婚10周年,張繼聰再次喺facebook撰文感謝Kay嘅陪伴「晃眼十年,因為有你同行,就算走過高山低谷,我都覺得沿途風光明媚。能夠有如此靈魂伴侶,讓這趟地球之旅變得幸福完滿。」

相關新聞:月內生得 老公傍實謝安琪挺肚會友 張繼聰呆等接送

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載