› 選擇地區
三藩市
紐約
洛杉磯
其他美國地區
香港 台灣 北美
 
2017年02月03日

北上搏殺 暴瘦十多磅
魯芬患皮肌炎留院:情況OK

現年62歲的魯芬(原名張偉芬),去年到內地開工時曾患上神經性皮炎,因病消瘦了十多磅,昨日有自稱魯芬朋友的讀者張先生向《蘋果》報料指魯芬病重留院。
魯芬年初二曾於facebook貼圖跟大家拜年,但其後幾日都沒再更新。昨傳出她留院消息,張先生昨在電話中表示曾往探望:「佢平時開開心心好多嘢講,𠵱家就插晒喉,好似認唔到人咁,唔知佢乜嘢病。知佢上次喺內地拍完嘢後,病得好犀利。」張先生稱與魯芬相交多年:「佢唔係好好景,好似係佢家姐睇住佢。前幾個月我有陪過佢睇醫生,我咁啱又得閒,幫到手咪幫囉,佢嗰陣講嘢已經好似冇乜力,但我問極佢都唔肯講乜嘢事。」張先生稱魯芬暫無法說話。

出入醫院幾個月

記者聯絡魯芬,其姪女張小姐昨以電話回覆:「芬姐休息緊,多謝你,有心了。佢一直患有皮肌炎,係免疫系統病,過往一直有進出醫院,𠵱家冇乜大礙。」張小姐希望低調處理魯芬留院一事,她說:「佢過去幾個月都出入醫院,呢次係過年前入院。」張小姐否認魯芬現插喉,她說:「之前有,𠵱家佢落到床,胃口同精神都OK。」何時出院?張小姐說:「要再觀察,等醫生決定。」魯芬昨晚以短訊回覆:「多謝,有心。身體健康!暫時情況OK,多謝關心。」圈中友人都慰問魯芬,她續說:「哈哈,好有愛啊,感恩!」

嚴重可影響心臟

魯芬去年7月撐枴杖現身歌舞劇《香港過來人》拜神儀式,她承認去年北上開工時患神經性皮炎,肝酵素偏高,胃口變差兼易攰,至今未完全康復,她謂不可吃太甜及肥膩食物,亦要減肥,她曾說:「住啲酒店唔乾淨,開頭以為少少痕冇事,點知越嚟越大,好似生蛇咁。」皮肌炎發病主因是免疫系統失調所致,嚴重皮肌炎病患者可波及身體其他器官,例如心臟、呼吸系統、食道及消化系統,亦可引起併發症如肺部纖維化發炎等。
此外,鄧英敏謂大半年沒見魯芬,只知道她最近皮膚不太好。吳麗珠也知魯芬患皮膚病:「詳情唔知,後尾問佢話冇嘢,可能係疲勞過度。」斑斑則透露:「幾個月冇見,知佢有啲事。」
採訪:嵐山、劉敏

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載