› 選擇地區
三藩市
紐約
洛杉磯
其他美國地區
香港 台灣 北美
 
2017年02月05日

不滿被指合股開「鼎李滷味」
鼎爺勞氣 轟李錦聯抽水

李家鼎與金剛昨日到屯門V City出席新春活動,兩人即席下廚整福袋及「撈起」。提到日前李錦聯笑指要與鼎爺開食肆「鼎李滷味」,他聞言即大爆不滿被抽水,鼎爺說:「黐線啦!佢抽我水,原本影張相冇所謂,點知佢爆呢啲嘢,我唔鍾意。兩個加埋都百幾歲,話佢又唔好意思,搞笑、搞gag冇所謂,不過我唔知呀嘛!有共識就冇問題,佢事前又冇同我講。」

相關新聞:被鼎爺鬧抽水李錦聯:欽點佢拍廣告都未抽佣

開食肆嫌辛苦大壓力

原來抽水事件之後,鼎爺曾和李錦聯聯絡,他說:「過咗去啦!我有話佢有冇搞錯呀?佢自己都話係抽我水,唔講都講咗喇。」至於可有興趣開食肆?鼎爺笑謂:「何來巨款?唔會啦!好多人搵我合作,不過我冇答應,都要睇吓啱唔啱。如果自己搞,真係20%興趣都冇,好大壓力㗎!打和就辛苦,蝕就PK,真係要『鼎佢滷味』呀。」鼎爺早前曾表示不介意與楊思琦合作,昨日他再說:「如果公司安排,我冇所謂,我唔想打爛人飯碗,我唔鍾意咁樣。」

李錦聯:未問佢磅水

李錦聯昨日回覆本報笑說:「呢排鼎爺紅吖嘛,搵佢合作大家有着數,同佢係自己友,佢講乜咪由得佢囉,我𠵱家做宣傳顧問,之前拍廣告,推出鮑魚餐『問李點鼎』,都係我欽點鼎爺一齊拍,咁我咪構思吓可唔可以同鼎爺開間『鼎李滷味』囉!話我抽水,我都未問佢磅水呀。」
採訪:盧妹、王梓嫚
攝影:陳俊強

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載