› 選擇地區
三藩市
紐約
洛杉磯
其他美國地區
香港 台灣 北美
 
2017年02月05日

被鼎爺鬧抽水
李錦聯:欽點佢拍廣告都未抽佣

李錦聯冇同大台續約後,連講嘢都變得灰諧有創意,早排佢出席活動時,就話想同呢排爆紅嘅李家鼎合作賣滷味,個名都改好咗叫「鼎李滷味」。

李錦聯搞搞綽頭,點知換嚟一盆冷水照頭淋。事緣昨日鼎爺出席活動時,就鬧爆李錦聯抽自己水,仲話對方冇事前同佢講,如果開舖,蝕咗就真係要「鼎佢滷味」啦!

《蘋果》昨日就搵過李錦聯, 得知鼎爺向自己開火,李錦聯不怒反笑喺電話中講:「呢排鼎爺紅吖嘛,搵佢合作大家有着數,冇所謂啦,同佢係自己友,佢講咩咪由得佢囉,我o依家做『小肥牛』宣傳顧問,咁之前拍廣告,推出個鮑魚餐叫『問李點鼎』,都係我欽點鼎爺同我一齊拍廣告,咁我咪構思吓可唔可以同鼎爺開間『鼎李滷味』囉!哈哈,話我抽水?我都未問佢磅水呀。」

李錦聯又話為咗慶祝小肥牛今個月10號喺創業版上市,已經向公司提議到時加兩道菜式,一道叫「鼎心鼎肺豬雜麵」同「鼎李個肺豬肺湯」,佢仲不忘話要整多道菜式俾舊拍檔安德尊。李錦聯話:「佢(安德尊)係半個西人嘛,送個燒羊鞍俾佢,以前啲恩恩怨怨咪燒埋佢囉!」

相關新聞:不滿被指合股開「鼎李滷味」鼎爺勞氣 轟李錦聯抽水

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載