› 選擇地區
三藩市
紐約
洛杉磯
其他美國地區
香港 台灣 北美
 
2017年02月05日

《乘勝狙擊》又玩講古
陳秀珠俾人綁架仲有時間向仇人訴苦?

近期大台劇《乘勝狙擊》入面灑鹽花,之前幾集已經不斷有陳山聰同莊思敏嘅床戰片段,睇完嘅觀眾都要講番句「令人好不安呀」。

點知呢啲鹽花原來未灑完,星期五播出嗰集,明明係傅嘉莉同朋友喺海邊訴苦,點知突然殺出陳山聰同莊思敏,仲要突然激咀,嗌完兩句交,又再次返咗酒店繼續肉搏,如果唔係黃子雄突然出現,觀眾又要睇多次佢哋賣肉……

個角色咁「大食」,陳山聰係咪好享受呢?佢前日回覆傳媒時話:「作?演員盡量配合劇本,佢哋或者想呢幾集劇情有一啲變化,不過放心,所有激情場囗已經完結,生理反應真係唔會有,電視尺度點到即止。」

前晚一集嘅重點,其實喺呂珊度,佢明明就落藥綁架咗陳秀珠,但就好似大把時間咁聽陳秀珠講番件事,真係要就嚟死都講番個原因出嚟。以往多數都係奸人講點解殺人,但今次就調返轉,係被害人解釋,而奸人就要慢慢聽,為咗令到件事冇咁突兀,今次《乘勝狙擊》就多咗個新玩法,一心要殺人嘅呂珊,無啦啦拎咗盆水出嚟,原來係想磨刀,連磨刀石都準備好,話要磨利把刀殺陳秀珠,等佢有時間慢慢講。

至於心急搵番陳秀珠嘅單立文(豹哥),就捉咗有傷在身嘅陳展鵬同林夏薇返香港,不過明明係要救人,豹哥竟然三番四次咁企定定同陳展鵬講大道理同回憶往事,好似陳展鵬叫豹哥丟咗支槍,同埋吳岱融當年係點跌落海等等,真係等你救都蚊瞓。

而陳展鵬明明係中槍入院嘅,返到香港行得走得,最有趣係喺室內地方就要㩒住心口扮痛,出到去郊外就精神奕奕,其中有一幕仲好似約埋豹哥一齊行山咁。

另外,返到香港無耐就俾豹哥打暈咗嘅林夏薇,噚日回覆傳媒話老公之前都有追開佢嘅劇:「不過最近唔喺香港就要返去一齊追番,因為劇情好緊張,身邊好多朋友都追。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載