蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年02月07日
馬上成為壹會員

撐枱腳醫肚開始 羅天宇湯洛雯緋聞傳足4年

羅天宇同湯洛雯呢一對……暫且叫同事先,因為合演無綫處境劇《愛‧回家》而傳緋聞,劇中湯洛雯要暗戀羅天宇,估唔到戲假情真,兩人真係撻着。羅天宇同湯洛雯喺2013年10月被《蘋果》拍到一齊喺元朗拍拖食酸辣粉斷正,「洛宇戀」正式曝光,當日羅天宇揸住佢架Audi戰車,載湯洛雯去醫肚,着住黑色情侶裝嘅「洛宇」喺小枱對坐,之後羅天宇車湯洛雯返九龍塘寓所,再傾咗一輪先揸車返自己位於將軍澳嘅屋企。當時,湯洛雯聲稱兩人只係收工一齊食飯,係普通朋友,但就勁讚羅天宇「人好好、好nice,樣樣嘢都好。」

被爆戀情斷到正,但當事人唔認,點知湯洛雯位同屆好姊妹朱千雪就不慎爆料「佢話自己係同子仁(羅天宇飾)嘅。」

事隔幾年,「洛宇戀」消息冇停過,連去飲都一齊去,但就搵人坐喺中間隔住吓,惟佢哋不時被目擊行孖咇出現,好似上個月初,佢哋被《蘋果》讀者陳先生透過「爆相爆片」喺九龍灣MegaBox拍拖睇傢俬,其間兩人有商有量,但羅天宇見到附近有人拎起手機即警覺地同湯洛雯分開走。

「洛宇戀」傳足4年,又有相為證,都仲係「朋友」,呢啲……叫友誼永固?

相關新聞:羅天宇專揀身材好女星 湯洛雯Coffee苟芸慧榜上有名

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載