› 選擇地區
三藩市
紐約
洛杉磯
其他美國地區
香港 台灣 北美
 
2017年02月14日

情人節真心話 對家庭對仔女
麥潔文讚江華:唔係流

今日情人節,一雙一對晒恩愛。圈中情侶齊放閃,結婚24年的模範夫婦江華和麥潔文分享相處心得,並投訴老婆近年愛打機遭冷落,老婆不肯陪聽枕邊話,麥潔文解釋怕意見不同避爭拗,之後大讚老公對家庭子女一條心。即將結婚的前女騎師江碧蕙自爆獲未婚夫Jerome每日一句「I love you」冧到暈;另一位準新郎石修囝囝陳宇琛,與未婚妻林佑蔚整甜品時,表現得煙韌。

相關新聞:「求其戀」27年畫作送江華 麥潔文:諗住佢嚟畫

現年54歲的江華與62歲的太太麥潔文結婚24年,當中經過不少風浪,至今依然恩愛,他們日前在上水接受本報專訪。想當年這段姊弟戀,原來是女追男開始,麥潔文爆料:「係我追佢,呢個年紀,我唔怕認,當年問佢攞電話約出街。」江華自揭當年也有另一女藝人相約去街,他揀麥潔文是因為覺得她夠純,他讚老婆是全世界最完美女人。

撒賴話寂寞

江華卻嫌老婆近年沉迷打機:「臨瞓時,我有嘢想分享,講唔夠三分鐘,佢就畀啲鼻鼾聲我聽,打機又好精神,我越嚟越撩唔起佢。」他即席情深投訴老婆:「你知唔知我有時好寂寞㗎?」麥潔文反駁是不想意見不合爭拗,江華自問當年未夠成熟,她則做出封嘴動作:「咁十年八年累積到今日,唔講最安全。」夫妻瞬間燃出小火花,江華馬上肉緊搭老婆膊頭撲火,麥潔文繼而把手放老公大髀。

相關新聞:江碧蕙未婚夫日日情話

犯錯婚外情

江華曾於95年拍亞視劇《我和春天有個約會》與鄧萃雯傳婚外情,他說:「每人心裏有把尺,邊個最重要、最鍾意,去到某啲位,你自然會知。」江華最感激人生高低潮,老婆不離不棄。麥潔文也撐老公:「人會犯錯,我都會,一犯錯就記負分?咁佢平時有加分,佢對家庭負責同緊張,佢對仔女愛護,唔係流。」今日情人節,麥潔文會送畫作冧老公。
採訪:鍾國仁、王梓嫚
場地提供:歌賦嶺

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載