› 選擇地區
三藩市
紐約
洛杉磯
其他美國地區
香港 台灣 北美
 
2017年02月18日

拜金Seasun變臉?
同屆旅遊小姐:唔係好認得

被喻為「拜金港女」Seasun,因為拍咗大台即將推出嘅實況節目《有樓萬事足》,當中發表「有樓有高潮」、「冇樓好白撞」嘅膠論,仲有公猴「洞穴論」(新聞連結: http://bit.ly/2lUgVUN ),全城嘩然,連街坊都睇唔過眼,有港男不屑話:「要睇自己呎數囉!」

現年22歲嘅Seasun現職珠寶公司公關,曾經幫過趙世曾打工,前日被《蘋果》踢爆曾入住過趙苑,可惜趙生對佢冇乜印象。

與Seasun同屆參加由趙世曾贊助嘅《國際旅遊小姐》嘅鄺芷凡(Omi),當年係冠軍得主,代表香港出外參賽,仲入到最後20名及奪得「國際旅遊大使獎」,依家Omi仲入咗有線做主持。

昨日《蘋果》致電Omi問佢識唔識Seasun?佢話:「佢當時叫Givanna(鄧寶怡),但佢坐喺梳化嗰啲,我都唔係好認得,係見番啲舊時參選相先認到,因為當時好多人,同佢冇乜交流。(個樣唔同咗?)er……靚咗囉!」而確實Seasun喺2013年參選同o依家有啲唔同咗樣,個下巴位尖咗、闊咗,難怪Omi唔認得!

Seasun曾經幫趙世曾打工,有傳因為無家可歸,曾獲安排入住趙苑其中一個豪宅單位,問冠軍嘅Omi有冇住過趙苑?Omi笑笑口講:「冇啦,呢個機會未輪到我啦,哈哈哈!(你冠軍喎?)唔會啦,自己都唔係咁樣,自己都唔係諗呢個方向。」

對於Seasun志向遠大,希望住2000呎大屋,仲爆埋個洞穴論,Omi好輕鬆咁話﹕「咁有志向係好事,佢有能力嘅話,做到係好事。」問到佢有乜擇偶條件?Omi話﹕「都係要鍾意一個人先一齊,唔係個個有樓你就鍾意㗎嘛。要錫自己,起碼大家要感覺啱先可以拍拖。」好貼地喎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載