› 選擇地區
三藩市
紐約
洛杉磯
其他美國地區
香港 台灣 北美
 
2017年02月25日

無綫御用奸人 燒金牛成名 
何浩源教陳凱琳做戲

【《蘋果》專訪】
現年50歲的何浩源,曾於94年拍過張智霖(Chilam)主演劇集《射鵰英雄傳》中哲別一角,何浩源近日被網友在facebook分享在無綫舊劇《天降財神》中「金牛肥牛鍋」一幕,他燒一千蚊銀紙,富貴離地演技被網民激讚。何浩源日前在沙田接受本報專訪,他現職Comedy Battle的藝術總監,繼續過戲癮。

唔想呃富豪

何浩源讀中四時便拍戲,處男作演一隻老鬼,中學畢業後升讀演藝學院,同屆同學有詹瑞文、陳錦鴻和麥兆輝等。畢業後入無綫拍《殭屍福星》、《笑傲江湖》、《刑事偵緝檔案2》等劇集,有七成演奸角,其後感到沒大發揮離巢,近日他返回無綫教藝訓班,教過陳凱琳和蔡思貝。他在訪問為兩人平反:「開頭以為港姐得個靚字,演技係要浸,佢哋外形好,上堂時投入認真。」
有指何浩源當年離開無綫因鬱鬱不得志,他爽快說:「真係鬱鬱不得志嘅!做好多奸角都好出位,跟住我就諗,唔通成世喺TVB做奸角?」何浩源跳出無綫後做過傳銷及地產,他說:「我賣九肚山豪宅,個客認得我,當我friend咁信晒我,所以我唔想呃佢。我試過呃過啲客,我唔想再用演技呃人,咁我就唔做。」何浩源也去過澳門新濠天地訓練員工。

感激李添勝

何浩源表示感激「金牌監製」李添勝,當年選中他演《射》劇的哲別,他說:「教郭靖射箭嗰個蒙古師傅。」他回想試造型時,大膽向添哥提出角色要黐鬚:「我印鬚根就同Chilam差唔多大,唔係幾好睇,不如試吓做虬髯客黐到成面都係鬚。」他的認真成為添哥御用班底:「如是者就黐吓黐吓,黐咗幾個劇。」不過最後有指他拒拍《雪山飛狐》被迫離巢,他說:「後生嗰時,一個火就做咗一啲決定,但又未必係壞事。」
採訪:植詠珊
攝影:卓振輝、馮峰
場地提供:沙田廣東人小廚

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載