› 選擇地區
三藩市
紐約
洛杉磯
其他美國地區
香港 台灣 北美
 
2017年03月04日

喜事連連 復出拍新劇
車保羅榮升爺爺 笑孫仔似蝦米

恭喜恭喜!現年57歲的車保羅(原名吳溟蒼)昨日首度榮升爺爺,其24歲混血兒子吳卓偉與新抱Gerlie的B仔昨日上午順利出生,重6.23磅,健康可愛。
車保羅昨日在電話中喜孜孜地說:「我孫仔今朝7點17分出世,佢老竇係雞仔,我呢個孫又係雞仔,頂癮呀!我新抱喺屯門醫院生,個孫好輕,得2.85kg(約6.23磅),我啱啱抱佢嚟,真係好似攣弓蝦米咁。」問他首次做爺爺的感覺如何時,車保羅說:「梗係驚喜若狂啦!」又指孫仔尚未正式改名,但他們都叫BB做Prince Timothy,並指孫仔暫時樣子似兒子。

心律不正入完院

原來車保羅日前因病入院,沒想到孫仔乖巧,等他康復出院才出世,令他大感幸運和欣慰。車保羅說:「早兩日我入咗醫院,心律不正,呢樣好耐嘅事啦,忍咗好耐,但最後發現唔對路,過咗年咪入醫院check囉,3日搞掂,唔使通波仔,醫生話食阿士匹靈得啦,之後血管全部過到,但唔可以做粗重嘢、唔好受刺激,即係你鬧我阿媽我都要忍。人老就機器壞㗎啦,自己講說話陰聲細氣啲囉。」

出山拍港版《CSI》

除了康復出院和孫仔出世外,車保羅還有一單喜訊,就是獲ViuTV邀請出山拍劇,跟邵仲衡、尹揚明、楊思琦和劉錫賢等拍攝港版《CSI》的新劇《詭探》。記者指車保羅孫仔腳頭好時,他笑謂:「Very good。」
車保羅在2003年被無綫炒魷後,只偶爾拍攝電影,整整14年沒拍劇集,問他今次為何肯出山時,車保羅說:「對方誠意邀請,戲軌又啱。部劇全部鬼,用晒香港以前發生過嘅靈異事件代入劇情,幾過癮㗎。」可擔心拍劇辛苦?他說:「唔會,我哋得幾組㗎咋。」
採訪:魯吉

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載