› 選擇地區
三藩市
紐約
洛杉磯
其他美國地區
香港 台灣 北美
 
2017年03月22日

張衞健老婆睇住出世
蘇永康榮升爹哋 鄭紹康:恭喜佢

現年49歲的蘇永康(阿公)老來得子,前日老婆馮翠珊為他誕下兒子,不過,阿公尚未公佈喜訊,好友雷頌德昨在尖沙嘴出席攝影集分享會卻率先爆響口:「嚟緊都會幫蘇永康影,佢噚日做咗爸爸啦,你哋唔知咩?」

開心BIG FOUR有後

據知,阿公原本想待母子出院後才宣佈喜訊,怎知卻忽然被公佈榮升爸爸,惟有昨提早報喜:「好多謝大家關心,小弟的確係榮升咗老竇級啦!母子平安,BB好可愛。第一次做爹哋,心情當然係非常非常感動同開心!新手上任,有啲手忙腳亂,所以請容許大家畀少少時間我,過兩日等我安定下來,先同大家分享我嘅喜悅!」
好友張衞健昨在電話說:「我老婆(張茜)特登喺北京返嚟陪佢老婆生仔,阿康仲自己剪臍帶㖭,見到佢戴住手術帽、着手術衫、揸住把鉸剪,真係《妙手仁心》上身。」問阿公有否感動到喊?健仔笑說:「咁又冇喊,我感動到喊,BIG FOUR終於有後。BB手長腳長樣似老母,我即刻放心晒嘞,似阿媽咁咪靚仔。老婆話入產房前,阿公舉手投足依然係架勢,但生完揸住BB手指即刻溫柔晒,我好戥康媽抱孫開心。」
另外,曾因三千元侮辱價被阿公數臭的「天下第一關」鄭紹康,昨晚在中環出席Gucci活動表示:「已經託朋友問候佢太太,做完活動等我send個message恭喜佢啦,生BB係開心事,都值得開心嘅。」會否送禮物?他說:「知有朋友夾緊,夾到點解唔夾呢?」是否還嬲?他說:「冇諗呢啲啦,都新一年向前望。」會否致電阿公恭喜以破冰?他支吾說:「呢啲緣份嚟嘅。」

Wyman改名被拒

同場的黃偉文(Wyman)戥阿公開心,他透露看過BB相,覺得頭大似爸爸,體重約6磅多,晚上9時許出世,更自爆幫BB改英文名Kelab,但被蘇媽媽拒絕了,他眼濕濕說:「冇得改名都會錫BB,知道佢母子平安真係想喊。」徐濠縈則說:「恭喜蘇家BIG FOUR添丁,第一個男『袋』,祝BB健健康康快樂成長。」
採訪:盧妹、羅慧敏
攝影:仇志德

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載