› 選擇地區
三藩市
紐約
洛杉磯
其他美國地區
香港 台灣 北美
 
2017年03月23日

【《蘋果》專訪】25年後俾蟹仔掟落台
秋官嗌寶貝仔 世紀團圓

鄭少秋20歲入行,一做便半個世紀,不論張無忌還是丁蟹,秋官要幾瀟灑有幾瀟灑,要幾野蠻有幾野蠻。今年是秋官入行50周年,記者請來25年前被丁蟹掟落街的「孝蟹」邵仲衡、「益蟹」陶大宇和「利蟹」郭政鴻跟蟹爸世紀團圓,幾父子一見面興奮相擁,一聲「寶貝仔」,幕幕《大時代》經典場面恍似重現。

相關新聞:欣賞李司棋好入戲

老婆嫌誇罷睇

邵仲衡最難忘當日拍完聯交所通宵戲後再拍跳樓戲,他說:「本來喺幾十層樓高天台度吊威也,好危險,有乜差池就係咁先,終於第二日搭過個景去跳。」大宇好奇問秋官若《大時代》給他改寫結局,會否再掉幾隻蟹落街時,秋官笑說:「唔掉落去就開唔到頭㗎喎!」
秋官一向形象正氣,何以肯接演丁蟹這個野蠻角色?他笑謂:「我係信韋家輝嘅,係有少少冒險,因為我初期做嘅時候,影迷全部反對,老婆反對,話咁誇張唔睇,直至後來重播佢同我一齊睇。」原來秋官跟幾隻蟹仔合作都要承受相當大壓力,秋官說:「要㩒住四隻仔,班友亂爆肚,我話你哋可以亂噏但唔好『叉禍』我條路,畀番條路我行。」

「運氣最緊要」

大宇好奇秋官入行50年是抱住甚麼心態繼續堅持努力,秋官說:「我一直好堅持、好有毅力,從排骨秋、面青口唇白、瘦到得半邊人嘅鄭少秋,竟然捱到咁多有代表性嘅角色,做呢行點努力點堅持都好,運氣最緊要。」丁蟹效應已成香港股市現象,有人擔心秋官今年5月28、29日於紅館舉行「半世紀.大時代」演唱會時股市會有大波動,但秋官卻說:「呢個詛咒由我今年入行第50年開始破咗,只要你睇我演唱會佢就會升啦。」
秋官還相約三隻蟹仔擔任個唱嘉賓,並建議:「唔係我掉你哋,係你哋掉我落台呀!」幾父子最後合唱《大時代》主題曲,為演唱會作熱身。
採訪:戴彩煥、譚倩宜
場地提供:香港怡東酒店

相關新聞:邵仲衡謝秋官教放鬆

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載