› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

拍拖38年「金輪法王」張雷
下月娶老婆

現年62歲的資深演員張雷跟53歲的女友鄭淑儀,早前入紙申請註冊結婚,張雷是習武世家,身手敏捷,入行時任職武術指導,曾跟隨導演張徹,亦加入過無綫做演員,演過多套經典劇集,最令人印象深刻是他於《神鵰俠侶》演「金輪法王」,如今他已經離開無綫,近年除了替港台拍劇,亦拍了不少網劇。

「多年都有名份」

昨日本報記者致電恭喜張雷入紙註冊結婚,問他會否擺喜酒,他即搞笑謂:「擺過好多次啦!其實我哋一齊好多年喇,有個朋友喺婚姻註冊處做,話我知有個靚期,咁我就話是但啦!」他續說:「我哋都38、39年喇!其實佢咁多年都有名份㗎啦,名份係虛幻嘢,日日都咁開心,平常心就開心,最穩陣。擺酒邊個得閒咪邊個食囉,冇所謂啦,成日同朋友食飯。」
張雷指他與準張太早以老公老婆相稱,但沒有影過婚照,也沒有擺過酒。他說:「冇影婚照,我哋唔係嗰啲,我酒都唔飲,擺乜嘢酒吖!屋企人全部都知,外母都知,所以今次真係有朋友話有靚位咪去(註冊)囉,冇所謂啦,做呢啲嘢又得,唔做又得!」女友是否同行?他笑說:「佢唔係呢行,但幫我手,我哋一向都一齊,所以唔係做咗助手先一齊。」

李國麟:恭喜佢

已離開無綫的張雷,現在工作排得密麻麻,近日正在拍由劉德華監製的Fox劇集《香港華爾街》,另外還有網劇及其他工作。問他何時正式簽紙?他笑說:「下個月20幾號啦,我唔記得咗呀,我有抄低,當度期囉,計埋車程幾個鐘應該得啦,簽紙好快咋嘛,到時畀地址我咪去囉!」
跟張雷老友鬼鬼的李國麟,反而不知老友要結婚,他說:「佢冇同我講喎!但係都咁多年喇!佢同女朋友成30幾年喇!都係一個交代。」問李國麟送甚麼賀禮?他笑說:「唔使喇!我諗佢唔會搞,都係畀個名份女朋友,等我遲啲打個電話畀佢,恭喜佢。」
採訪:非非

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載